Diesel man thar Zirtawp zan, zanlai atanga khan Diesel man tih danglam a ni a, Mizoram hmun hrang hranga a rate thar tur chu : Aizawl Rs.54.21; Vairengte-ah Rs.54.08; Champhai-ah Rs.54.32; Hnahthial-ah Rs.54.17; Kolasib-ah Rs.54.12; Lawngtlai-ah Rs.54.16; Lunglei-ah Rs.54.21; Saiha-ah Rs.54.22 leh Serchhip-ah Rs.54.22 a ni. Venghlui-in dem Venghlui Local Council chuan thu-chhuah siamin 30.1.2014 zana Venghlui Bazar, Pisa tlanga mi tutih hriatloh misual in, ni tin eichawp zawng mi harsa te te eizawnna hmuna bomb an tipuak chu an dem tih an sawi a. A titute hi a rang thei ang bera man chhuak a, an phu ang tawk hremna pe ngei turin an phut tih an sawi bawk. UPSC-ah tling Zohnahthlak nula, Esther Laltankim Serto chu ni January ni 29, 2014-a UPSC exam result chhuakah Indian Forest Service (IFS) a tling. Esther Laltankim Serto (Esther Laltankimi Serto) d/o Yaimuchung, hi Lamphelpat, Imphal, Manipur hi tunah an chhungkuain Carol Bagh, New Delhi-ah an cheng mek. NCCI Centenary National Council of Churches in India (NCCI) chuan February ni 3 & 4, 2014 hian YMCA Building, S.N.Banerjee Road, Kolkata-ah a kum za tlin lawmna an buatsaih dawn a, Mizoram Chief Minister Lal Thanhawla chu khuallian tura sawm a ni a, a nupui Lal Riliani chu Khualzahawm tura sawm a ni bawk. He Centenary lawmna inkhawm hmanpui tur hian Chief Minister te nupa hian nimin khan Aizawl an chhuahsan. Dist. MJA hruaitu January ni 31 khan Kolasib, Serchhip leh Mamit District MJA te chuan khawmpui neiin kum 2014-2016 chhunga hruaitu thar an thlang. Kolasib District MJA President thar atan H Vanlalnghaka, Vice President-ah C Thanmawia leh Treasurer-ah H Lalmuanpuia te thlan an ni. Serchhip District. MJA President atan Kapliana Pachuau, Vice President-ah Lalremruata Ralte leh Treasurer-ah C Lalhminghlua te thlan an ni. Mamit District MJA President atan R Lalmuanpuia, Vice President-ah RD Darthanzauva leh Treasurer-ah Lalhuma te thlan an ni bawk. Free Service Camp Two wheeler lama tui, Facebook hmanga inkawmkhawm, “INFO BIKES” Group chuan nimin khan mite tana tangkai leh malsawmna an nih theih nan Mizo High School Field, Macdonald Hill-ah “Two Wheeler Free Service Camp' an buatsaih a. Lirthei ke hnih nei chi eng pawh, siam ngai leh thlak ngaite man awm lovin an siamsak a ni. Zira damsam lo Home Minister R Lalzirliana chu tunlai hian a damsam meuh lo a, doctor-te thurawn angin in lamah damdawi nen enkawl mek a ni. Home Minister hian kar kalta khan a pianna khua Tualbung leh a bial Tawi Assembly Constituency huam chhunga khaw hrang hrangte tlawhin nuamsam vak lo chungin a zin a, mahse, nimin piah khan a nawm loh zual deuh avangin a programme hmang zo hman lovin Aizawl lamah a kir leh a, doctor ten a thisenah rannung seh natna ang chi an hmuh avangin hahchawl rih turin an ti a ni. NSS Inkhawmpui NSS (Cell), Mizoram chuan February ni 3–7, 2014 chhung hian India hmarchhak NSS Volunteer Festival, North East NSS Festival 2014 chu Mizoram University, Tanhril, Aizawlah a thleng ang. India Hmarchhak NSS Volunteers 350 bakah Mizoram chhunga NSS Volunteers 35 an tel ang. Festival hi February ni 4 chawhma dar 11-ah Youth Affairs Minister Zodintluanga'n hawngin, February ni 6 chawhnu dar 2:30 ah H&TE Minister R Romawia'n a khar ang. Sorkar tawiawm turin chah Aizawl; Aizawl West-II bialtu MLA, Lalruatkima chuan, kawng hrang hranga bial tihhmasawn nan leh chak taka hma a lak zel theih nan amah tanpuia finchhuah turin mipuite a ngen a. 'Democracy ram kan nih angin kan khawtlangin sorkar hmalakna hi theihtawp chhuaha kan tawi-mawm a tul a ni,’ a ti.