Press Conference February ni 17, 2014 tlai dar 2 hian Aam Admi Party chuan Aizawl Press Club-ah thuthar lakhawmtute an kawm dawn a, Mizorama Aam Admi Party din a nih thu an puang dawn nia hriat a ni. Mandal la chhuah lo Nikum November ni 23-a Bru misual ten an rukbo zinga mi, an la chhuah ve loh, Deep Mandal chu nimin khan chhuah beisei a ni a, mahse, heng Bru misualten an mi rukbo an hrenna hmun Mahmuam bawr vel hi nimin khan Bangladesh President, Abdul Hamit-a'n a tlawh avangin sipai vak vel an tam hle a, Bru misualte hian an la tawmbopui rih nia rin a ni. Deep Mandal hi Bru misualte kutah hian ni 64 zet a awm tawh a ni. Lokayukta Bill Law & Judicial Deptt. chuan February ni 19, 2014 chawhma dar 11 khian New Secretariat Conference Hall, Khatla-ah 'Lokayukta Bill, 2014' chungchang sawihona a buatsaih dawn a, Law Minister Lalsawta'n a hmanpui ang. MHMA hruaitu Mizoram Hawaii Musical Association te chuan nimin khan hruaitu thar atan heng mite hi an thlang : President-ah E Lalhleia, Vice President-ah Remmawia, Secretary-ah Roseia, Asst. Secretary-ah Ronguauva, Treasurer-ah R Lalliana, Financial Secretary-ah Zamlova te an ni. Spain-ah kal dawn Michael Lalremtluanga s/o R Lalrosanga, Serkawn, Lunglei chuan February ni 22, 2014 hian Barcelona (Spain)-a ELT Convention-ah ‘ Using the learners L1 in the Classroom the Bilingual method’ tih thupui hmangin Paper a present ang. Michael Lalremtluanga hian MA, M. Phil a zo tawh a, tunah hian Chennai-ah Ph.D a ti leh mek a, February ni 20, 2014 khian India chhuahsanin Spain a pan ang. Lawmman sem February ni 14, 2014 khan Assembly Annexe Hall-ah Road Safety Week vawi 25-na kharna inkhawm neih a ni a, Transport Minister John Rotluangliana'n a hmanpui a. Road Safety Week puala lawmman buatsaihte sem nghal a ni a. Best point duty (Traffic police) chu F Lalngaihawma, Best beat officer chu Chawngthanpuia niin, Best sector officer-ah K Lalremngaia, Best zonal officer chu S.I. Lalromawia Khiangte, Best city bus driver-ah Lalmuanpuia, Best Maxi-cab driver-ah J Lalmama Sailo leh Best taxi driver-ah C Lalrosanga te an ni. Chin National Day Chin State sorkar, Myanmar chuan Chin National Day champhaphak vawi 66-na, February ni 20, 2014 khian Mindat, Chin State, Myanmar-ah an lawm dawn a, Ministry of Foreign Affairs, Republic of Union of Myanmar leh Indian Embassy, Yangon, Myanmar kaltlangin Chief Minister Lal Thanhawla chu tel turin an rawn sawm. Myanmar-ah Chin National Day hmanpui tur hian nimin khan MSU Gen. Hqrs. Pre. Zodinpuia chuan Aizawl chhuahsanin Myanmar a pan a ni.