Session zawhna March ni 18, 2014 atanga April ni 3, 2014 chhunga Mizoram Legislative Assembly thutkhawm tur atan Zirtawpni thleng khan tawngkaa zawhna chhan chi (Starred Question) 82 leh ziaka chhan hi (Un-Starred Question) 6 a lut tawh a. Resolution 10 bakah Paper Lay tur 2 a lut tawh bawk. Phirthum hring February 24, Thawtanni kalta khan Lalawmpuii w/o FC Laldinmawia chuan Maraland Gospel Centenary Hospital, Saiha ah phirthum (triplets) a hring a, heng naute te hi an hriselna pawh a tha a, a piang hmasa ber hmeichhia hi 2.65kgs a rit a ni a, a pahnihna mipa 2.9kgs a rit niin a pathumna hmeichhia chu 2.5kgs a rit a ni. Ruat thar MNF President Zoramthanga chuan MNF Thalai (MNYF) President thar atan L.Thangmawia Associate Prof. PUC, tuna MNF Gen.Hqrs. a Secretary ni mek chu a ruat thar a, Vice President ah Saihnuna Sailo a ruat bawk. Pul hri leng Tunlai hian Hnahlan leh a chhehvelah ran pul hri a leng a, Lawi 10 vel an thi tawh nia thudawn a ni. Hnahlan VCP Kapchhuanthanga chuan ran thih chhan tak hi an la hrelo tih sawiin Lawi el an thi tawh a, ran dang Bawng leh Sial erawh thi an la awmlo niin a sawi. Hmang dawn MNF Party chuan naktuk March ni 3,2014 chawhma dar 11:30 hian Mizo Hnam Run ah Mizo National Day an hmang dawn a, Hnam Martarte sunna an neih dawn bakah President Zoramthanga'n thu a sawi ang. Press conf. 3rd Mizoram Bamboo Day hman tur chungchang sawifiahin organising committee chuan naktuk chawhnu dar 1 hian Aizawl Press Club ah chanchinbumite kawm an tum. Pension Agriculture (Research & Education) Director C.Lalniliana chu February 28 khan pension in a chhuak a, Director (R&E) ah hian H.Lalthanpuia chu dah nghal a ni. H.Lalthanpuia hna chelh thin Joint Director (MMA) ah hian ITC Hnahthial a Principal H. Thankhuma chu dah a ni bawk. Seminar March ni 5, 2014 chhun dar 12 khian MJA Gen. Hqrs., Aizawl leh Information & Communication Technology (ICT) Deptt. tangdun buatsaihin Aizawl Press Club-ah 'Good Governance' chungchang seminar neih a ni dawn a, I&PR Minister Lal Thanzara'n a hmanpui ang.