VAIHLO MEETING Naktuk March ni 3 chhun dar 12 hian ATI hall-ah Mizoram Tobacco Control Society chu an chairman Arun Goyal, Principal Secretary, Health hovin an thukhawm dawn. March ni 5 chawhnu dar 1 hian state level road safety council chu an chairman Transport Minister John Rotluangliana pisaah an thukhawm ang. Boral Aizawl; Mizo pasaltha Hranghleia fa tlum ber Hmingliani (97) chu nimin zing dar 7 khan lungphuchawl-in Chawngtlai khua ah a boral a, nimin chawhnu dar 1 khan pasaltha chawimawina famkim nen vui a ni. Chawngtlai Welfare Committee, Aizawl leh Mizo Historical Village Committee, Chawngtlai te chuan Hmingliani chu an ui tak zet tih an sawi a. Tuichang bialtu MLA Lalrinliana Sailo pawhin ‘Zofate tan channa nasa tak’ a ni a ti bawk. Pension Karnataka state a Director General & Inspector General hna chelh mek Lalrokhuma Pachuau, IPS chu nimin khan pension in a chhuak. MPSC-ah Andrew Mizoram Governor chuan ram danpui Article 316 (1)-in thuneihna a pek angin Mizoram Public Service Commission (MPSC) Chairman atan MPSC Member ni lai mek Andrew Lalherliana chu a ruat a,MPSC Chairman atana ruatna lehkha hi nimin khan sawrkarin a tichhuak a ni. Thisen pe Nimin khan Tuikhuah tlang Branch KTP chuan KTP Day pualin Synod Hospital, Durtlang damdawi ina hman turin thisen unit 46 an pe a, thisen petute hi mipa 34 leh hmeichhia 2 an ni. MNYF in phut MNF Thalai (MNYF) chuan an ngenna ngai pawimawh lova sawrkarin chhiah, bill chi hrang hrang leh buhfai man te a tihniam duh lo chu hriat thiam harsa an ti hle tih sawiin a rang thei ang ber a ennawn a, tihniam tur leh damlo harsa thisen mamawhte hnena a thlawna pechhuak turin an phut tih an sawi a. An thil phut nawr nan a tawp thlengin mi retheite thlavang hauhin MNF thalaite chu an la kal zel dawn tih an sawi. MNYF chuan kum 6 Congress sawrkar chhungin phullem phah bak hmasawnna awmze nei a awm lo niin an sawi. Chawhlui kilho Nimin khan Congress Thalai leh MPC Thalaite chuan Rajiv Gandhi stadium, Mualpui ah inthianthatnan football an khel a, hetah hian MPC lam hi 3-1 in an chak a, tlaiah chawhlui an kilho nghal. %%%%%%%%%%%%