Aizawl July 6, 2024 : Tukin zinga World bank road Petrol pump bul kawng chhak lam Ngaizel khama Saza humhalh lai chu chau taka hmuh a nih hnuah a thi a, Vety lama post mortem a nih hnu-ah a hriselna dinhmun a lo tha lo a, kawthalo leh thinlian bakah natna chi hrang hrangin a lo tlakbuak a ni.

Saza hi a tira hmutu T. Ngaihliana sawi danin a thawm a hria a, a han hmuh chuan a lo la thi lo a, an bawihsawm hnu lawkah a chatthla zui a ni. A chanchin hriat a nih ve leh Forest leh ASEP lamte a hmunah an kal nghal a. Kulikawn branch YMA Zampuimanga section ten a ruang hi puanin an tuam thlap a ni.

Vety ten an post mortem a nih hnu-ah he Saza hi a hriselna dinhmun a lo tha lo hle a, kawthalo leh thinlian bakah natna chi hrang hrangin a lo tlakbuak ni. Chumi avanga taksa chak lo vanduaina tawk ta niin ngaih a ni a. A taksaah silaia kahna emaw, thang awhna hliam hnuhma hmuh a ni lo va, hri inkai darh theih vei niin a lang lo bawk. Kum 13 vela upa niin, 70 kgs zeta rit a ni. Post mortem-a enfiah a nih hnu-ah Forest lamten phum turin an la a ni.

ASEP chuan Saza thihna chungchangah a tira lo hmutu T. Ngaihliana leh Kulikawn YMA Zampuimanga section lamte an fakawm an ti a. Anni bakah felfai taka buaipui ngai zawng zawng buaipuitu Forest dept leh Vety lamte chungah lawmthu an sawi a. Kulikawn YMA ten an humhalh mek Ngaizel kham ngawa nungcha awmte humhalhtu ni zel turin mipuite an sawm a ni.