ZALEN March 15, 2025; Vawiin (15.03.2025) tlai khan NGOCC a tel pawl hrang hrang - Central YMA, MHIP leh MZP hruaituten Mizoram tlawha rawn zin mek, Union Home Minister Amit Shah chu Raj Bhavan ah an hmu.

Pawl hrang hrangte hian kan ngaihpawimawh thil chi hrang hrang an sawi pui a. Chung zingah chuan Lengpui Airport tih changtlunna tur sum ruahman sak tur leh tichangtlunna tura ruahmanna siam turin an ngen a. Union Home Minister hian Lengpui Airport chu tihchangtlun a duh thu leh a ngaihpawimawh thu sawiin, Airport Authority of India (AAI) in a buaipui tur thu a lo sawi a. Thla thum chhungin AAI hian thil tul zawng zawng an buaipui ang a, thla ruk chhungin tihchangtlun hna an thawh tan tur thu a sawi bawk. 

Hetianga kan ram rohlu te zinga mi, Lengpui Airport tihchangtlunna tura ruahmanna siam a ni hi NGO Coordination Committee chuan lawmawm an ti a, Union Home Minister Amit Shah chungah lawmthu an sawi.

Lengpui Airport tihchangtlunna tura theihtawp chhuaha ngaihtuahna sengtute leh mipuite tanrualna avangin lawmthu an sawi bawk.