Aizawl: Mizoram Sawrkarin District thar pathum a siam mekah Ngopa RD Block huamchhunga khaw awm zawng zawng leh Lengteng Constituency chhunga khaw tam zawkten Saitual District chhunga awm ngei an duh.

Ngopa RD Block huamchhunga khua heng - Ngopa, Khawkawn, Mimbung, Pawlrang, Hliappui, NE Khawdungsei, Chiahpui, Kawlbem, Teikhang, Changzawl, Saichal, Hrianghmun te chuan Saitual District-a awm an duh thu hi vawiin khan Chief Minister Pu Zoramthanga, Lengteng Constituency bialtu MLA Pu L.Thangmawia leh Sawrkar hotu dangte hnenah ziakin an thlen a ni.

Heng khuate hian Champhai district-a an awm chhungin district capital panna kawng chungchangah harsatna an tawk nasa thin tih an sawi a, Khawzawl district-ah awm dawn ni se hei tho hi an harsatna tawh leh tur a nih avangin veivah chungchangah Saitual District-a beh chu an tan tha ber turah an ngai tih an sawi a ni.