Aizawl January 17, 2024: Vawiin khan Serchhip DC David Lalthantluanga, Competent Authority for Land Acquisition (CALA) ni bawk hovin NH54 kawngpui laih mek chungchangah Serchhip District thuneitute, NHIDCL te leh Khumtung, Baktawng, Chhiahtlang, Chhingchhip, Serchhip, Keitum leh Bungtlang VC ten meeting an nei a, compensation la tawh In la thiat lo te inthiah sak an nih tur thu hrilh an ni.

Serchhip DC David Lalthantluanga chuan NH54 kawngpui laih mek chu kumin March thla hian zawhfel tum a ni a, hun rei tak chhung mipui ten vaivut khu te tuarin, nunphung pawh a khaihlak phah a, khawtlang tana hmasawnna tur kawngpui pawimawh tak laih mek chu zo tep tawhin, a hmawr bawk a hnai ta chu lawmawm a tih thu a sawi. Hetihlai mek hian zangnadawmna sum a pumhluma la tawh si, in la thiat duh lo tlem te an la awm a, heng mite lakah hian District Administration chuan khawng takin hma a la dawn, tih a sawi a. Kar hnih khat hnuah an la thiat lo a nih chuan nawr chhiat sak an ni a nga, IPC Sec 188 hmangin case siam sak zel an ni dawn tih DC chuan a sawi.

In thiat lo zingah Court a kal, Court in stay order a pekchhuah an awm a nih chuan an in te tihchhiat sak an ni dawn lo tih DC chuan a sawi a. Stay order an neih loh erawh chuan thutling a nih loh avangin thiahsak ngei tur an nih thu a sawi bawk. Zangnadawmna la lo te, assessment tih lai a hmaih palh te, building chhawng assess kim loh te an awm chuan thuneitute nen a hmunah ngei tlawhin enfiah an ni dawn tih meeting ah hian a tarlang a, zangnadawmna an lak ngei theih nan hma laksak an ni dawn a ni.

Kum 2023 July leh August thla khan zangnadawmna dawng tawh, in la thiat lo te hi Magistrate ten an inah ngei kal chilhin an in te thiat tura thupek eviction notice an lo pe tawh a. Nikum November thla khan in thenkhat chu Executive Magistrate kaihhruaiin thiah sak an lo ni tawh a ni. Vawiin meeting-ah hian case tin te uluk taka en leh sawi ho a ni a. In an thiah theih loh chhan leh harsatna an tawh dan te sawiho a ni a. Lungawilohna ziaka thehlut te chungchang pawh ngaihtuah a ni a, meeting ah hian anmahni ngei koh luh niin an dinhmun te hrilhfiah an ni.

Dan anga in thiahsak leh case awrh tir kher an ngaih lohna turin District Administration chuan Serchhip District chhunga khaw hrang hranga in thiat duh lo la awm te chu thiat vek turin VC te kaltlangin a hriattir nawn leh a ni.