June 14; 2022; Youth For Environment Justice Mizoram (YEJM) hruaitute chuan NHIDCL Executive director Virendra Jakhar chu, Mizoram hmun hrang hranga dan lo anga leivung an paih a hmun enpui tura an inpeih thu leh, amah pawh lo inpeih ve nghal tura an beisei thu an sawi.

Vawiin khan Aizawl press club ah thuthar thehdarhtute kawmin, YEJM spokeperson Lalrinfela chuan, Aizawl, Champhai, Thenzawl leh Lunglei a DFO ten dan bawhchhiatna awm ngei nia an hriat vangin tunhnai khan NHIDCL kawng laih mekte chu chawlhsan turin stay order pek an nih thu a sawi a, chutiang a nih lai chuan hmun thenkhatah an hnathawh chhunzawm luiin, an leivung pawh kan luiah an la paih zel tih an hmuh thu a sawi. "NHIDCL hian environment humhalh dan te leh ram leilung fate min zah loh zia an lantir zel a, Kawng an laih dawna tih ngei ngei ngai Environment Impact Assessment (EIA) pawh pakhat mah an la zawm lo zui zel," a ti bawk.

NHIDCL Executive director, Virendra Jakhar-an DDK Mizoram palai hnen a an kawng laih vung thehthang chungchangah dan lo a engmah an tih loh thu leh leivung paih lohna turah an paih lo tih a hrilh chu dawt ngialngan a nih thu sawi bawkin, Lalrinfela chuan, fur laiin tui a nu thin a, thil danglam a nih loh thu a hrilh te pawh, fur laia tui nu satliah leh leivung thli leh chirh dumin a tih nut chu mi pangngai tan hriathran loh chi a nih loh thu a sawi.

"NHIDCL kawng laihna hmun za a 99.9 ah kan lui kawr leh luite (seasonal leh perennial river) te an kawng laih vungin a chhilh vek avangin ruah surah an kawng laih vung, chirha chang ta chu kan lui lianah a luang lut a. Kan lui liante chu leivung leh bawlhlawh (siltation) a a khah avangin kan lui tuite hman tlak lohin a nut phah tih a hmuna en pui turin kan inpeih a, kan en ho ngei tur a ni," YEJM spokesperson chuan tiin, "Kan environment leh ram leilung fate zahpah lo taka tawngkam a chhakchhuah hi a siam tha leh a nih loh chuan eng tikah mah kan ngaidam thei lo ang," a ti bawk.

YEJM hruaitute zing a mi Romalsawma pawhin, NHIDCL chungchangah hmalakna tur a tam tih sawiin, kan luite tihchhiat a nih mekna ah, Mizo mipui kan ṭanrual a ngaih thu leh sawrkar kutah emaw chauh dah tur a nih loh thu a sawi.

"Motor kawngpui laih vangin leivungin lui leh thlai hmunte a tichhe nasa em em a, chuti chung chuan, NHIDCL Executive director chuan leivungte a paihna tur dik takah kan paih a la ti sak sak ngam a, kan lui an tihchhiat hi a turu lutuk a, lungawina tur a awm lo," Romalsawma chuan a ti.

Thuthar thehdarhtute zawhna chhangin, YEJM hruaitute chuan, NHIDCL in Mizote min zuam em avangin, kan ram ang em em a lui leh leilung tihchhiat nasatna, hmun dangah a awm lo tih an sawi a, chungte chu NHIDCL in Mizoram a hna an thawh tan dawn a Mizoram sawrkarin a tih tur ang a tih loh vang a nih thu an sawi.