Aizawl: Mission Director, National Health Mission (NHM) Dr. Eric Zomawia chuan NHM hnuaia thawk, tiamchin awm lova a huho a chawlh la mekte chu bân an nih lohna chhan tur ziaka ni thum chhunga insawifiah turin a hriattir.

NHM Mission director chuan nimin khan NHM hnuaia hnathawk, a huho a chawlh la mekte chu ‘show cause notice’ pein, July 11-13, 2022 chhung phalna nei lova casual leave late leh chumi hnua indefinite strike NEUM-in a huaihawt thlawpa hna zawm lote chu Mizoram Essential Services Maintenance Act, 1990 (as amended) Section 4 & 6(1) bawhchhia an ni tih hriattirin, hna a an luh dawn a an intiam tawhna (agreement deed) para 3(3) angin bân theih leh kum khat thleng tantir theih an nihna bakah, Rs. 2,000 chawitir theih an ni tih a hriattir a ni.

Mission director chuan NHM hnuaia hnathawkte chu a rang thei ang bera an hna zawm tur leh an hna atanga bân an nih lohna chhan tur ziak a, ni thum chhunga a hnena insawifiah turin a hriattir bawk.

NHM hnuaia thawkte hian NHM Employees Union (NEUM) bultumin an thil phut hrang hrang tihlawhtling tura sawrkar kar nan July 11-13 chhung mass casual leave an lo la tawh a. July 12 zan khan Deputy Chief Minister Tawnluia leh Health Minister Dr. R. Lalthangliana bakah sawrkar hotu dangte nen inbe mah se, inremna an nei thei lo a, a huhoa chawlh an lak hnuah tiamchin awm loin an nawrh chhunzawm mek a ni. 

NHM hnuaia thawkte hi doctor, nurse, health worker, laboratory technician, pharmacist, data entry operator leh thawktu dangte an ni a, an vaiin mi 2,200 vel an ni.