Aizawl January 8. 2024 : Vawiin khan ZPM chuan Party Office-ah kum 2024 atan Party Office hawnna leh chhung inkhawm hun an hmang a, Party Leader Lalduhoma chuan tun atanga chuan eng party mahin an kalphung hlui ang kha chuan an hneh tawh dawn lo niin a sawi a, Ni 100 chhunga an thawh tura an duan tam tak an tihlawhtling tawh a ti bawk.

Party Leader leh Chief Minister ni bawk Lalduhoma chuan, “Ni 100 chhunga thawh tura kan duan tam tak kan ti hlawhtling tawh a, a dang pawh tihlawhtling turin theih tawpin hma kan la mek zel a ni. Opposition party te hi chona thianghlima cho kan duh a, kum 5 a ral leh hunah ZPM let thla tur khawpin inbuatsaih rawh se. Tun atang chuan eng party mahin an kalphung hlui ang kha chuan min hneh tawh lo ang,” a ti.

Lalduhoma chuan, “Kum tharah khan kan nupain kan ram a him theih nan leh kum that kum a nih theihna turin Pathian hnenah kan dil a. Bible kan thlir chuan a mite tan Pathianin ring lo mite hausakna lak a phal a, ramdang hausa zawkte budget tawmsak theiin Israel fate a siam a. Keini pawh Delhi, India leh ramdang hausakna chhawr tangkai turin Pathianin kawng min ruahmansak ang tih kan ring a, a ram leh a felna erawh kan zawng hmasa ang,” a ti.

Chief Minister chuan, “Myanmar atanga raltlan lokalte chhinchhiahna Biometric Identification hi sawrkar hmasa hmalakna kal zel, kan chhunzawm mai tur a ni a, fimkhur zawka kal kan tum a, thlamuang taka kan awmhona tur ruahmanna Union Home Minister atangin Assurance kan dawng a ni. Ramdang mi kan rama ILP hmanga lo lutte kan vei em em a, Mizoramah heng mite chhinchhiahna tur felfai leh changkang zawk siam thei an awm a, hmalak tum a ni," ti.

Lalduhoma chuan, "Pu Nitin Gadkari Union Minister, Road Transport hnenah kum khat hun min pe tur leh kum khat chhunga kan thawh theih min fiah turin ka dil a, hna chak taka kan thawh theihna turin Aizawl Eastern by-pass Road, sawrkar hmasain a lo buaipui tawh hmalak nghal a nihna turin sanction kan nei tawh a ni. Hna kal lai, loh theih loh a chhunzawm ngai a awm a, cancel ngai erawh engemawzat awmin heng sum chuang bang hi ba rulh nan kan hmang dawn a ni," a ti.

"Kan thalaite tan kawng a inhawng dawn a, eng pawl nge tih leh eng party nge tih lam kan sawi dawn lo. He ram siamtha tur hian kan zavaiin kan leng vek a, hna kan thawk tlang dawn a ni. Entrepreneur zawng zawngten Company rintlak thawhpui tur zawng ula, kan lo pui dawn che u a ni. Khawvel hi kan daidar a hun ve tawh a, khawvel huap thil kan thawh a hun tawh a ni,” a ti bawk.