Aizawl April 5, 2024 : Vawiin khan Serchhip New Venglai YMA Hall-ah ZPM Serchhip Block Political Training neih a ni a, He hun hmanpuitu Bialtu MLA leh Mizoram Chief Minister Lalduhoma chuan Ni 100 chhunga thawhb tura an ruahmanna te tha takin an thawk thei tih a sawi.

Chief Minister Lalduhoma chuan, "Tunhnaia zoram dung leh vanga thli leh ruah bakah rial thawk thutah khan Zoram dung leh vang hmun hrang hrangah mipui ten harsatna an tawk hi a pawi ka ti hle a, chutih lain Serchhip Bial-ah harsatna lian lutuk tawk an awmlo hi a vanneih thlak hlein ka hria. Tun hmain Khuarel chhiatna avanga in leh lo leh thildang chhiatna tuartu (victim) ten chhawmdawlna rei tak tak an nghah thin chu ZPM Sawrkar hnuaiah chuan a hun takah pek an ni ta a, hei hi kalphung thar leh thil lawmawm tak a ni,” a ti.

ZPM Leader Duha chuan,”ZPM a sawrkar veleh khan zoram mipui lawmin an auva, chuvangin mipuite hi kan tih beidawn ve a thiang lo. Kan Sorkar hma atang khan rorelna kan chan huna kan kal dan tur ruahmana fel tak kan siam a, chu ruahmanna ang chuan vawiini thlengin kan la kal a ni. Ni 100 chhunga thawh tur kan ruahmante pawh Pathian hruainain tha takin kan zo fel thei a, hengte hi kan that bik vang leh kan fel bik vang ni ngawt lovin thil tha lo ni a langte kan ti lova, thil tha ni a kan hriatte chu kan tih mai thin vang a ni," a ti.

A bial chunchang sawiin, "Ka Bial Serchhip mipuite chungah hian thinlung takin lawmthu ka sawi a, MLA Bye-Election atang tawha Mizoram tan example tha tak set tu in ni hi ka chhuang em em che u a ni. Kan hma lawk MP inthlan lo awm turah pawh hian kan MP Candidate Pu Richard Vanlalhmangaiha, party hruaitu ten lungrual taka kan rawn chhawp chhuah hi lo vote tling ngei turin ka sawm che u a ni,” a ti.