December 5, 2022: Mizoramah tun hnai ni 50 liam ta chhung khan chhiatna lian tham, chetsualna/vanduaina thlenga mi 2 aia tam thihna thlengah mi 35-in nunna an chân a. Chung zinga 7 te chu bike leh pik-up chesual a thi an ni.

ZALEN-in a chhinchhiah chinah ni 50 liam ta chhunga chhiatna lian thama thi mi 25-te chu Maudarh quarry chima thi mi 12 leh Tuirial Airfield venga tanker kang vanga thi mi 13 an ni a, current man vanga thi 3 awmin, lirthei chesual a thi mi 7 an awm.

Nimin December ni 4 zing khawvar hma khan Lunglei district-a Thingfal khaw daiah lirthei, pick-up chesualin, kawng thlangah a lum a, lirtheia chuang zawng zawng,  Lawngtlai district-a Sabualtlang khua vek mi pali an thi. Mitthite chu puitling pathum leh naupang pakhat an ni a, Delhi atanga Krismas hmang tura haw leh hmuaktute an ni.

November 14 tlai khan Maudarh khuaa ABCI lung lakna hmun (quarry) chu chimah mi 12  an thi a, boralte hi an vaiin hnam dang vek an ni.

November 10, 2022 tlai dar 3 vel khan Champhai leilet kawngpuiah bike a chesual a, mi pathum chuangin an vaiin an thi a; Champhai, Khuangphah leh New Champhai mi an ni.

October 29 tlai dar 2:30 vel khan Tuirial Airfield peng bulah tuialhthei phur chesualin zan dar 6 rik hma deuhin a kang a, a hmunah mi pali an kang hlum a, hliam tuar damdawi ina enkawl mi pakua an boral leh a, tanker kang thite hi mi 13 an tling tawh a ni.

Lawngtlai district-a Rulkual khuaah October 14 chhun khan electric current man vangin mi pathum an thi a, mi pahnih na takin an hliam bawk.