ZALEN August 20, 2023 : Tun dinhmunah ni khata Aizawl khawpui bawlhhlawh paih thin chu quintal 1,723.8 a tling a, chumi atana thla khat senso chu Rs. 47,21,208 a tling.

Aizawl Municipal Corporation (AMC)-a SPIO-in ZALEN RTI zawhna a chhan danin, Aizawl khawpui chhung bawlhhlawh paihna atan lirthei 151 hman mek a ni a, thla khatah Rs. 47,21,208 vel hman thin a ni.

Bawlhhlawh tawih thei lo bikah recyclable-te chu rag picker hmangin lakkhawm a ni a, scrap dealer hnenah hralhin, anni hian state dangah an thawn chhuak thin.

Plastic item leh RDF (Refused Derive Fuel)/MLP (Multi Layer Plastic) chu bailing machine hmangin bail a ni a, bail-te hi cement factory-ah lungalhthei ruala hal turin phurh chhuah thin a ni.

Tawih theite chu mechanical compost plant hmangin leithaah siam chhuah thin a ni bawk.

Tun dinhmunah chuan solid waste management centre, Tuirialin bawlhhlawh paihte a dawl zoa ngaih niin, bawlhhlawh tawih thei leh tawih thei lote hi Tuirialah mumal taka thliar hran niin, ni khata Aizawl khawpui bawlhhlawh chu qtls. 1,723.8 a tling.

Tuirial ni lo, hmun dangah solid waste management centre din/siam tumna a awm a, Hualngohmunah siam mek niin, Luangmual lamah ruahmanna neih a ni bawk.

Bawlhhlawh hralh theih hralh tawh dan :
Metal                       - Qtls 564.9
Paper/Cardboard     - Qtls. 4442.53
Plastic                      - Qtls. 5038.93