Pa Pakhat fiamthuin, “Kan hriat loh lai hian min lo bial leh ringawt thin a,” a tih ang deuhvin Kohhran Hmeichhia atanga chanchinbu sem leh tui sem thleng hian bial chan bik neiin kan hriat lem loh hian tu bial emaw hi kan lo ni leh ngawt thin. Pang dama zing kan han tho chiah pawh hi kan hriat lem loh hian eng ni emaw ber, eng DAY emaw ni tak kan hriat lem lova ni pawimawh tak hi a lo ni teh fo va. India ram hi ram zau tak, mi tin chi tin mai lenna ram a ni bawk a, ni pawimawh tak tak leh chawlh pawimawh tak tak mai kan nei thluah mai a, National holiday pathum - Independence Day 15 August, Mahatma Gandhi birthday 2 October leh Republic Day 26 January bakah state pual chawlh neuh neuh leh sakhaw hrang hrang hun pawimawh bik - Sikh festival Guru Nanak Jayanti te, Hindu festival Makar Sankranti, Maha Shivaratri, Diwali, Ganesh Chaturthi, Holi, Dussehra te, Islamic festivals Eid ul-Fitr, Eid al-Adha, Mawlid an-Nabi te leh Kristian ni pawimawh Kristmas vuakvet leh Good Friday te hi ram puma hman thin a ni. Hei bakah hian khawvel pum huapa ni pawimawh taktak leh eng pual emawa ni serh hran bik International day kan tih mai lar tak tak - Valentine’s Day – 14th February, Earth Day – 22nd April, International women’s day – 8th March, Anti Tobacco Day – 31st May, International Children’s day – 13th June, Labor Day – 1st September, World AIDS Day – 1st December leh a dang tam tak sorkar pisa leh zirna in inkhar kher si loh hi kum khatah ni 30 bawr vel a awm bawk a, kum khata kan ni 365 hi a tial rang hneh hle. India ramah kum 2013 khan ni 19 chawlh (public holiday) a awm a. Kum 2014-ah Mizoram ah chawlh ni 23 zet a awm a, heng zingah Inrinni leh Pathianni a tla ni 5 a awm bawk. Khawvel ram changkang zawk leh hausa zawkte kan thlir chuan Mizote hian awm nikhama hnathawh chawlhsan hun hi kan ngah hle mai. YMA day kan hmang zo va, Remna Ni kan hmang leh zel bawk a. Chawlh hrim hrim hi a pawimawh dan azirin awm leh phu hliah hliah bakah a mihring nghawng tam tan azira chawlh âwm deuh hi chu a awm ngei mai. YMA Day te hi chu ram pum a thalai zawng zawng nghawng a ni a, chawlh hi a awm viau, thawk khat lai kha eng pawl emaw pual bik, mipa lam huap lem lo kha sorkar khan chawlh list atangin an thai bo chhin a; amaherawhchu, chawlha dah let tura nawrna a nasa deuh emaw ni tehreng, a hnu lawkah sorkar chawlhah an seng lut leh ta mai a. A bikin kamding zingah kum khata kan hnathawh hun chhungte hi a darkar pawhin mi ramte lakah chuan beitham tak a nih avang hian hmasawn tur chuawn hnathawh nasat a ngai tih chu tlang hriat a ni awm e. Ei leh bara hmasawn chak duh avangin kan hnathawh hun (work culture) tih danglam rawtna a awm ta zauh zauh a. Chu chu hria in ram tam tak chuan DST, Day light saving time kan tih hi a ngai pawimawh em em a. Kan thenawm mai, Bangladesh pawhin DST hi 19th June 2009 atangin a hmang tan a, a sana darkar khata herh hmain (Bangladesh standard time), a mean Longitude 90 E ni si kha 105 E-ah a set tak avangin darkar 7 laiin GMT aiin ahma a, darkar 1½ laiin India aiin a hma ta thung a. Chumi awmzia chu keini India hmarchhak aia ni eng darkar chanve vel laia hmu tlai zawk si kha keini zing 10 (IST)-ah pisa kan kai chuan Bangladesh pa chuan darkar 1½ lai hna a lo thawk tawh tihna a nih chu. Mizote hi kan thatchhe lem lo, tunah pawh hian kan hnathawktu tam tak hi hmun khat mai lova inhlawh leh hnathawk an awm ta nual, damdawi lama thiamna nei leh damdawi in lama thawkte hi Mizoramah chuan hetiang a hnathawh phung (Work Culture) thlak danglam tan hmasa pawl an ni awm e. Doctor atanga Nurse, Lab. Technician leh X-ray technician te thlengin a darkar hranah private damdawi in dangah te an inhlawh a, remchanna (opportunity) tha a awm phawt hi chuan engmah ti lova awm mai mai ai chuan hnathawh hi kan lo hre loh khawp mai. Ei zawnna dang vuantu tam tak pawh hi hetiang remchanna hi hmu se tam tak phei hi chu an inthawk hlum duh mai ang e tih tur khawpa taima kan ni awm e. Ram hmasawn leh ei leh bara intodelh nan hnathawh tam a pawimawhzia kan hriat tak tak hunah chuan a mipui lam hian sorkar chawlh tam lutukte hi kan la ui zawk ang a, “Kan chu mi kha mi ni pawimawh hi sorkarin chawlh (holiday)-ah puang ve rawh se,” tia pawl hruaitu sorkar nawr chingte hi hruaitu thilti thei ni lovin hruaitu thatchhiaah kan ngaih hunah chuan hma kan sawn ve ngei ang. Sawi tawh angin ni tin mai hi tute emaw tan leh eng pawl emaw tan bik chuan Ni Pawimawh leh Ni Serh bik a ni vek mai; hnathawh tam hlutna leh pawimawhna kan hriat hunah chuan ni tin mai hi ni pawimawh ber a ni tih kan la hre ve chhawm em ang chu maw?! - Hruaia Colney, Chanmari, Aizawl