ZALEN April 16, 2026 : Mizoram Synod Secretary, Rev. B Zohmangaiha chuan Synod hnuaia Kohhran te hnenah April ni 11 lehkha thawnin, Thenzawla Biak In lian sak mekah Kohhran mite sum leh tha thawh tawh lo turin a ngen.

Rev. B Zohmangaiha chuan 'Thenzawla Zoram Thar Zofate Lairelna Inpui tia Biak In tur sak mek hì Kohhhran rorelnain (Church court) a rel ni lova sak leh din a nih avangin Kohhran mite telna tur chi a ni lova. Chuvangin he Biak In sakna thilah hian tha thawh emaw sum thawh emawa hma lo la lo turin Kohhran chhungkaw tinte kan inngen e,' a ti.

Synod Secretary lehkha, Kohhrante hnena thawnah hian "Tunlai hian kan ram chhungah Pathian rawngbawina anga ngaih theih tur si, Kohhran hmalakna ni lo, pawl leh mimal thahnemngaite hmalaknaa kan Kohhran chhungkuaa thawhlawm khawn an awm mek a," tiin, "Synod thu ding lai angin, Kohhranah emaw Kohhran chhungkaw tinah emaw mahni remhriatnaa tanpuina khawn hi tih loh tur a ni a. Hetianga tanpuina dil/khawn hi Kohhhran remtih zawng a nih loh avangin hetianga hma la an lo awm anih chuan Synod duh dan hre renga chhan dan lo thiam turin Kohhran mite kan inngen a," tiin lehkhathawn hi Kohhran inkhawmah lo puangzar turin a ngen a ni.