ZALEN April 17, 2026: MNF chuan India sipaiten Kum 2012/2013 vel atanga Sairang Kolabari ram, 615.58 acres vela zau, KLP (Key Location Plan) of Infantry Battalion tana lak tumnaah tun hnaiah ZPM mi leh sate, sum leh paia hlawkna umin rem leh rem loin an inrawlh ngei niin an hria.

Vawiina chanchinthar lakhawmtute an kawmnaan MNF Legal Board Vice Chairman Lalpianfela Chawngthu chuan, "He ramah hian Ministry of Defence hnuaiah survey tih mek a ni tih RTI chhanna tangin hriat a ni a. ZPM hotute zinga mi thenkhat an inrawlh ngei a ni tih lanna document (lehkha) pathum (3) RTI hmangin Aizawl DC Office-ah dil a ni a. Amaherawhchu, heng document te hi Section 8 (1) (a) a security leh strategic interest khawih a nih chhuan lamin pek chhuah a ni lo thung a ni.

RTI hmanga chhannaah hian a awm lo tih ni lo a, pek chhuah theih a nih loh thua min chhan avang hian a awm ngei a ni tih a chiang a ni. Chuvangin Chief Minister Pu Lalduhoma, Lok Sabha MP Pu Richard Vanlalhmangaiha leh ZPM hruaitu thenkhatte an inhnamhnawih dan hi sawifiah turin leh heng lehkha pathumte hi mipuiah tlangzarh ngam nghal turin kan phut a ni. Ram rorelnaa Pathian ram thlentir min tiamtu ZPM hruaitu lu ber berte ‘Sum leh pai ruihchilhna thlarauin a chenchilh zawk hi a vanduaithlak kan ti hle a ni," a ti.

Lalpianfela chuan, "ZPM Minister leh MLA thenkhatin Serchhip District-ah sipai ram lak tur nasa takin an buaipui mek a, Delhi tlang thlengin an umzui mek tih chiang takin kan hre thawi bawk a ni. FCAA 2023 pawm a lo ni ta hi hlawkpui tumin, sum siamna hmanruaa hman tumin thapui an thawh mek niin hriat a ni bawk a ni. Lengpui ram hralh hlawkzia nghawng chhoh zel niah a ngaih loh theih loh a ni," a ti bawk.