Aizawl : Mizoram hmun hranga hranga Vaimim suat mektu pangngang chi khat, fall armyworm te chu buaipuiawm khawpin an puang zel a, sorkar leh lo neitu lamin theihtawp chhuah mah se, awmzia a nei thei tak tak chuang lo. Crop insurance awm lo nen buaina a thuah hnih hle.
Mizoramah crop insurance hi sorkar hian an kalpui lo a, sawrkar puihna a thlen lawk loh phei chuan lo neitute hian khuarel tawrhna chu an tuar tlawk tlawk tihna a ni. Insurance an tihloh chhan chu India hmarchhakah hetianga insurance pe thei tur company an hmuh loh vang niin Agriculture department lam chuan an sawi a, tender chhangtu lam nen hian inremna an siam hlei thei lo a, hmarchhak hrim hrim tan hian company lam hian hma an la duh vak lo niin an sawi bawk.
Central sawrkarin crop insurance scheme a siam pawh Mizoram sawrkar chuan a bawhzui chuang lo niin Agriculture Department chuan ZALEN a hrilh a. February 13, 2016 khan Prime Minister's Crop Insurance Scheme chu hman theih turin a chhawpchhuak a, insurance la thei tur hian loneitute chuan fur thlai atan 2% an seng a ngai a, thlasik thlai ang chi ah chuan 1.5% chu an pek tul. Kumtluana chin theih chi sumdawnna thlai bikah hi chuan 5% chu loneitu lam hian an tum ve a ngai bawk.
ZALEN a hrilh danin Minister C.Lalrinsanga chuan Rapid Respond Force (RRF) tinin he pangang puang tih rem nan hian theihtawp an chhuah thu a sawi a. “District tinah RRF hi din a ni a, district tinah hmalak dan erawh a inang lo a, tawrh dan a zirin team pawh pakhat aia tam siam a ni a, Lunglei-ah phei chuan team sarih din a ni. Office staff zawng zawng kan intirchhuak a ni ber,” a ti.
Minister sawi dan chuan damage report lam pawh central sorkarah thehluh ni tawhin pangang beih let dan chauh an la rawn hrilh hrih a. Loneitute chungchang a sawinaah C. Lalrinsanga chuan, “Intuam-hlawmna (rehabilitation) tur lam pawh theih tawpin kan ngaihtuah a, kan loneitute tawrhna zawng zawng chhawk zo dawn lo mah se, an chhiat lohna tur chu kan ngaihtuah reng a ni,” tiin ZALEN a hrilh bawk.
Tihchhiat hi a ni telin a pung chho zel a, department lam chuan an sawi.

Pangang hian khaw 99-a loneitute vaimin chin chu a ei chhe tawh a, Aizawl District -ah khaw 36 ah puangLunglei district-ah 24 ; Kolasib district - 5 ; Mamit District - 10 ; Serchhip District -10 ;Lawngtlai District - 4 ; Siaha District - 4 leh Champhai District - 6 Ram hectare 1,409-a vaimim chinte chu a ei chhe tawhVaimim eichhiat tawh hlut zawng - Rs vbc. 19 Pangang pakhat hian vawi khatah tui 1500 chuang a keu thei Vaimim chauh lo pawh thlai hnah dang chaw-ah an ring thei.