ZALEN September 12, 2023 : Mizoram hmun kilkhawr ber thleng a nitin khawsakna a lo awlsam zawk nan leh Kawlphetha thianghlim, daih rei, leilung mil leh mitin ban phak hi tangkai taka hman theihna turin Northeast Initative Development Agency (NEIDA) leh SELCO Foundation tangkawp chuan intawhkhawmna hun vawiin khan an buatsaih.

Vawiina intawhkhawmnaah hian thupui atan“ Awareness Meet about Decentralised Renewable Energy (DRE) driven Solutions” tih hman a ni a, he campaign hi Innovation Facility Centre (MISTIC), MINECO ah neih niin, Aizawl District khaw 15 atangin mi 50 chuang an tel a ni.

Programme hawnna hmangtu B. Lakrinkima chuan SELCO FOUNDATION in ni zung hmang khawlte a bik takin Mizoram chhunga vawk leh ar vulhtu te post farm processing a tana a thawh hlawk zia a sawi.

Khuallian Aizawl DC Nazuk Kumar, IAS chuan ni zung hmang khawlte hman tangkai thiam a tulzia sawiin; nitin khawsak ei bar zawnna kawngah awlsamna min thlentu anih bakah sum leh pai inremchenna kawngah te nasa takin min pui thei bawk a ni.

Nazuk Kumar chuan, "Ni zung chakna hmang thei khawl chi hrang hrang te hi hun lo la kal zel tur atan in tin te hian kawl theuh thei ila, chu chuan kan khawsak a ti awlsamin, hmasawnna kawnga min tanpui thei tur hmanraw tangkai tak ani dawn a ni.

Awareness campaign ah hian Agriculture (lo neitu), Livestock (ran vulhtu), Micro Enterprises, FPO leh SHG atangin an tel a ni. Nitin eizawnna leh khawsakna kawnga harsatna tawh mek te leh kawlphetha hman tangkai theih dan kawng te sawi ho a ni. 

SELCO Foundation hian Agriculture, Livestock leh Micro Resilient Business huangah te Kawlphetha hmanga khawsakna tihhmasawnna kawngah nasa takin hma a la mek a- Aizawl, Serchhip, Kolasib leh Mamit District ah te hmalak mek a ni.