National Integrated Forum of Artists & Activists (NIFAA) chuan fiamthu thiam H. Rotluanga (Mapuia) hnenah 'Super Human Award' an hlan. Mapuia hi fiamthu khawvela a thawh hlawk avangin Zirtawpni khan award hlu tak hi hlan a ni.

Award a dawn chungchangah hian Mapuia chuan social media-ah lawmthu sawina a post a, lawmpuitu an thahnem hle. Mapuia chuan, "Kum 1999 te khan khatia khawr em em leh zei lo taka stage-a ka din ve te khan, hetiang hi ka la dawng ve ang tih hi ka ngaihtuah chhin ngai lo, ngaihtuah chu sawi loh he tiang lam reng a lang lo. Pathian hruaina tih loh chi reng a ni love. Ka thawhpui ka thiantha zephyr drama club te, FTH family leh ka chhungte leh Zoram mipuite zara he award dawng ve thei hi ka ni. Thank You (NIFAA) for recognizing my work & awarding me this accolade," tiin, award a dawn ropui a tih thu a tarlang. 

NIFAA hian - social, art leh culture lama mi thawh hlawk tak takte hnenah award an hlan thin a, Mizo zingah pawh chawimawina dawng an lo awm tawh. NIFAA India chuan kum 2021 khan ram zalenna sualtu ram tana martar mi pathum - Bhagat Singh, Rajguru leh Sukhdev te hriat reng nân ram pum huapin 'Blood and plasma donation' India a huaihawt. 

He campaign hriat reng nân hian NIFAA Mizoram Chapter chuan Mizo zinga thisen pe tam mi pathum hnenah chawimawina 'Golden Arm Award' a lo hlan tawh a ni. Golden Arm Award hi - RC Rokhum, C. Lalremruata leh Rebecca Saimawii te hnenah hlan a ni.