Aizawl: Nikum 2021 April atanga 2022 March inkar chhung khan Mizoramah thisen unit 28191 lak a ni a, heng zinga unit 25396 hi mi tlawmngai 'voluntary' a pek a niin voluntary a pek zat hi a pumpui atanga chhutin 90.08% a tling a ni.

Mizoram State AIDS Control Society hnuaia Mizoram State Blood Transfusion Council chhinchhiah danin nikum chhung khan Mizorama blood bank 11 awm zingah Civil Hospital, Aizawl ah thisen pek hi a tam ber a. Nikuma thisen pek zawng zawng 28191 zinga unit 14824 hi Civil Hospital, Aizawl a pek a niin thisen pek zawng zawng atanga chhutin 52.58% a tling a, nikuma thisen pek zawng zawng zatve aia tam hi CHA ah hian lak a ni.

Mizoram State AIDS Control Society thawktute atanga thudawn danin a thlawna thisen pek voluntary blood donation ah pawh kum hmasa lam aiin nikum khan a sang hret a. A thlawna thisen pek hi kum 2018- 19 ah 86.54%, 2019- 20 ah 90.91%, 2020- 21 ah 89.66 % leh nikum 2021- 22 ah 90. 08 % te a ni tih an sawi.     

Civil Hospital, Aizawl dawtah Synod Hospital, Durtlang chuan thisen hi an la hnem ber a, nikum chhung khan unit 2997 an la a. Civil Hospital, Lunglei chu pathumna niin unit 2360 an la bawk a. Mizorama blood bank 11 zingah District Hospital, Mamit ah thisen lak tlem berin unit 407 lak a ni.

Civil Hospital, Aizawl a Blood Bank Officer Dr. K.Rothangpuia chuan a thlawna thisen pek kawngah Mizoram chu India rama a titha pawl a ni tih ZALEN a hrilh a. "A thlawna thisen pek kawngah hian India rama a titha pawl kan niin top 10 ah kan lang a. State thenkhat helama titha deuh nia insawi te hi an record a dik em aw kan ti thin a. Keini ah chuan thisen lak hrim hrim hi a tam a, state thenkhatah chuan an la tlem a, hei hian voluntary percent hi a tisang niin kan hria a ni," a ti.