Aizawl July 7, 2024 : Taxation Department chuan nikum quarter hmasa ber aiin kumin quarter hmasa berah chhiah vaibelchhe 19 chuangin an hmu tam zawk.

ZALEN-in Taxation department thawktute hnen atanga thu a dawn danin nikum quarter hmasa ber (April-June, 2023) chhung khan chhiah chi hrang hrang atangin sum Rs. 3,07,09,62,356 an hmu a, kumin April atanga June inkar khan chhiah chi hrang hrang atangin Rs. 3,27,03,97,428 an hmu leh a. Nikum aia kumina chhiah an hmuh tam zawkna hi Rs. 19,94,35,072 a tling.

Department chhinchhiah danin nikum 1st quarter-ah GST atangin Rs. 2,74,07,51,892, Profession tax atangin Rs. 2,44,01,745, Sales tax atangin Rs. 30,57,36,169 leh thil dang atangin Rs. 72,550 an hmu a. Kumin 1st quarter-ah hian GST atangin Rs. 2,87,33,83,784, Profession tax atangin Rs. 2,04,24,135, Sales tax atangin Rs. 37,65,35,559, Entertainment tax atangin Rs. 10,000 leh thildang atangin chhiah Rs. 43,950 an hmu.

Sawrkarin kum 2023-24 chhunga Taxation Department revenue lakkhawm tura a bituk (BE) chu Rs. vaibelchhe 1,000.00 a ni a. Hei hi revise estimate (RE)-ah Rs. vbc 1,098.50-ah tihsan a ni a. Department hian an (RE) target hi Rs. vbc 14.08-a khumin, chhiah hi a vaiin Rs. vbc 1112.58 an hmu a ni.

Taxation department-in chhiah an hmuhna langsar zualte hi GST-ah vbc 970.25, VAT-ah vbc 125.93 leh Profession Tax atangin vbc 16.37 te an ni.

Chhiah hmuhna zingah hian GST atangin revenue lut a sang ber a, Mizoram VAT hnuaiah hian GST hnuaia lut ve lo petroleum products hrang hrang atangin chhiah lak a ni bawk a. Profession Tax hi dan ang taka eizawnna neite hnen atangin an sum lak luh atanga lak thin a ni. Heng bakah hian GST hman anih hmaa Entertainment Tax atanga chhiah ba lo lut Rs. 30,000 leh Firms & Societies registration fee Rs. 2,19,370.00 te a tel bawk a ni.

April-June, 2024 a chhiah hmuh dan

Thla   GST      Profession tax   Sales tax       Entertainment   Others   Total

April   131,68,64,006   42,46,013      32,90,55,464    10,000   21,700   165,01,97,183

May   77,04,92,727   79,10,097      3,24,96,883   -   10,700   81,09,10,407

June   78,60,27,051  82,68,025      1,49,83,212   -   11,550   80,92,89,838