Aizawl: Aizawl Municipal Council (AMC) chuan Ningni atang khian 50 micron tling lo polythene/plastic a khap tan dawn a, mipuite zawm hram turin an ngen.

‘AMC-in polythene a khap chin tur hi hi mi nawlpuiin kan hriatthiam theih dan awlsam ber tur chu dawra thil kan lei a, kan thil khaina tlanglawn te hi a ni ber ang,' tiin AMC Councillor Lalhmingmawia chuan Zalen a hrilh. Phai lam atanga rawn lut, heng internet-a kan thil chah an rawn funna ang ho te hi chu a huam dawn lo a, Burma lam atanga rawn lut Rambo polythene ang leh, rawng eng, a sen leh a pawl ho te hi chu hman phal a ni dawn lo thung nia thudawn a ni. AMC lam atanga ZALEN-in thu a dawn ang chuan tuna an khap tur hi chu Burma lam atanga rawn lut hi a ni ber.

Kuhva pack na atana hman hovah pawh hian phal chin ni pha lo tam tak a awm a, Bawnghnute pack na atana hman ho hi khap loh tur zingah hian a tel.

AMC Councillor Hmingmawia hnen atanga thu kan dawn danin, khawpui chhunga hetiang polythene zawrhna dawr an tlawh kual atang pawhin lakluh hi a tlem nghal hle a, a hma aiin 50% deuhthawin lakluh pawh a tlem nghal niin an hria.