Finance company Deloitte te chhut danin tun nipui transfer chhungin Premier League club te chuan, pawisa sen tam lamah record dinglai 2017 a mi chu khumin record thar an siam. 

Deloitte chhut danin club hrang hrang hian tun nipui chhung hian £1.5 billion an seng tling tawh a, record ding lai kum 2017 a mi £1.4 billion chu an khum tawh a, September ni 1 a khar tur chauh a nih vangin tunah hian kar khat bawr vel hun a la awm cheu a, tun aia tam hi club ten an seng ngeiin a rinawm. 

Nikum tun ang hun transfer hun khan £895 million an seng a, hun tawp zanah erawh £1.1 billion a tling phak. 

Deloitte Sports Business Group-a an assistant director Chris Wood chuan,"Covid hnuah club tiin Premier League club te business model thar nen in bazar-in pawisa an sen tam phah niin a hriat," a ti. 

Liverpool-in Benfica atanga Uruguay striker Darwin Nunez £64 million-a an lei te, Manchester United-in Brazil midfielder Casemiro £60 million zet a an lalut te, Everton atanga Brazil forward Richarlison Tottenham Hotspur-in £60 million a an lei chhuak leh Manchester City lamin Norway striker Erling Haaland-a £51.2 million zet a Borussia Dortmund atanga an lei te chu tun tum transfer-ah hian a lian pawl an ni.

England forward Raheem Sterling-a pawhin £50million zetin Chelsea a zawm a, a ni bakah hian Blues hian Spain defender Marc Cucurella chu Brighton atangin £60 million-in an lalut bawk. 

Premier League club te hian tun tum transfer window chhungin player 14 zet chu £30 million aia sang man an ni a, 2021 khan £30 million pel hi player pariat chiah an awm thung.