Aizawl May 19, 2023 : New Delhi-a cham mek Higher & Technical Education Minister Dr R. Lalthangliana'n National Institute of Technology (NIT), Mizoram dinna tura forest clearence mamawh a thlen chu Inspector General of Forest, Ramesh Pandey chuan a tih fel sak. BRO lam a dawr naah Tuipui ‘D’ Darzo kai lei dawh tur chu tihfel sak an nih tawh thu an lo hrilh bawk.

H&TE Minister hian a department kaihhnawiha an buaina NIT hmun tur sak chungchangah Forest Ministry tlawhin Inspector General of Forest Ramesh Pandey a hmu a, National Institute of Technology (NIT), Mizoram dinna tur hmunhma Lengpui-a mi, forest clearance hmuh loh vanga hmalak theih a nih loh dan a sawipui a, Ramesh Pandey hian forest clearance hi a lo tihfel sak a, minister pawh hian lawmthu a hrilh. 

Hemi chungchanga sum chawi ngai pawh Ministry of HRD in an chawi dawn a ni. Dr. R. Lalthangliana chuan Mizorama project lian tak tak kalpui mekah forest clearance ngai a awm thin avanga hmasawnna hnathawh sukuk a awm thin chu pawi a tih thu thlenin engemawchen chu ngaihnathiamna nen lo en thin turin a ngen bawk a ni.

Dr. Thangtea hian Border Roads Organization Director General Rajeev Chaudhary chu Lunglei leh Lawngtlai district inkalpawhna atana pawimawh tak Tuipui ‘D’ Darzo kai lei dawh tur chungchang a sawipui bawk a, BRO DG Rajeev hian clearance an tihfel tawh bakah tender an koh tawh thu leh a khawihtu tur contractor pawh June thla ral hma a thlan fel an inbeisei thu a lo hrilh bawk a ni. He project hi cheng vaibelchhe 90 hu niin July thla chuan hna tan theih beisei a ni. Minister hian North Vanlaiphai – Thingsai - Pang khua inkalpawhna BRO hovin an laih mek chu rang taka thawh zawh sak turin a ngen bawk a ni.