December 5, 2022; Senior Superintendent, Traffic chuan thuchhuah siamin, December 12, 2022 atangin ‘No Tolerance Drive/Checking’ neih a ni dawn tih a tarlang a, dan bawhchhia man reng reng te chu ngaihnathiamna a awm dawn lo tih a tarlang bawk.

Vawiin khan thuchhuah siamin, SP, Traffic chuan, kum 2022 Krismas leh Kumthar 2023; mitinin dam leh himtlang taka kan hman theih nan Aizawl khawpui chhung hmun hrang hrangah Aizawl Traffic Police leh Transport Department-te’n ni 12.12.2022 (Thawhtanni) atangin traffic dan bawhchhiate check/enfiah runpui ‘No Tolerance Drive/Checking’ neih a ni dawn tih a tarlang.

Lirthei khalhtu zawng zawngte Dan zawm a, fimkhur taka lirthei khalh turin a hriattir a, lirthei document fel fai lo te pawh a tul anga lo inruahman lawk turin a ngen. "Hemi chhunga dan bawhchhia man reng reng te chu ngaihhnathiamna a awm dawn lo a ni tih mipuite kan inhriattir lawk a ni e,"  tiin a tarlang bawk.