Aizawl February 24, 2024 : Debbie Vanlalhlimsangi (28) Keifang Venghlui chu Delhi (Noida) ah accident avangin a boral a, a ruang chu halral hman a lo ni tawh a, mahse, CCTV footage-a ruang landan atangin Debbie ngei a ni tih finfiah a ni.

Thudawn danin Debbie hi Qnet Company a thawk thin niin heta tang hian a bâng a, Delhi atanga Bangalore a company danga insawn tuma inruahman mek a, Feb. 22,2024 (Ningani) tlai dar 6:00 a chhuak turin flight ticket pawh a nei sa a ni. ZALEN thudawn danin February 18 (Pathianni) zana Noidaa a thiante nena an chawei khawmna atanga a chhuak chu, a tuk Thawhtanniah pawh a chanchin engmah an hriat tak loh avangin, Delhi a a thiante chuan a tuk Feb 20 (Thawlehni) ah Delhi Police Station pakhat Express 135 ah FIR an thehlut a. Chanchin engmah an hriat zui mai loh avangin Feb. 22 (Ningani) khan Keifang-a a chhungte chuan Saitual Police Station ah report in Addl. SP J. Rokima chuan Saitual SP, Pukraj Kamal IPS, Delhi-a chawlh hmanga awm lai chu be pawp nghalin, anin theihtawp a lo chhuah zui a.

Delhi Police Commissioner hnenah thil awm dan a hrilh hnuah chhui zui a ni a, hemi tlai vek (Feb.22) hian a thianten FIR an thehluhna ni lo, Police Station dang Noida Police Station Sector 142 huam chhunga ruang chhar halral tawh chu, CCTV footage a ruang lan dan leh a thih hmaa a inchei dan engkim a inan avangin Debbie ngei a ni tih finfiah a ni ta a ni.

Police ten ruang an chhar chu darkar 72 chhunga a chhungte hriat a nih loh avangin post mortem te engkim tih a nih hnuah halral a ni tih an sawi a. Police te chuan Highway kawng kân tum motor sut chesual a nih theih thu an sawi. Saitual SP leh a thawhpuite chuan vanduaina a thlen thu hi hre hmâ se, ruang hi halral hmain a chhungte hlan hman ngei an inrin thu an sawi bawk. Debbie ruang awm lo mah se, Kohhran leh khawtlang danin Zirtawpni khan Keifanga an chenna inah vui programme hman a ni a, a vâp erawhin an khua a thlen ngei theih nan hmalak chhunzawm mêk a ni.