December 21, 2022; Aizawl Mayor Lalrinenga Sailo chuan 'Shop Licensing Regulations' chu sumdawnna a inchimralna a ni lo tih sawiin, tun thlengin hnamdang (non Mizo) hnenah license 255 pek a ni tawh tih a sawi.

Vawiin a thuthar thehdarhtute a kawmna ah Aizawl Mayor chuan,  Shop Licensing Regulations in a phut angin Aizawl khawpui chhunga sumdawnna kalpui zawng zawngin AMC atangin phalna an neih vek a tul tIh a sawi a. Tun thlengin dawr/sumdawnna 7111 hnenah permit pek a nih tawh thu leh, chung zinga 255 te chu Non-Mizo an nih thu a sawi.

Thuthar thehdarhtute zawhna chhangin Aizawl Mayor chuan, Non Mizo Shop License an pek te chu Mizoram a kum tam tak lo cheng nghet tawh, a bikin Gorkhali unaute an nih thu leh Cement/Rod etc. zuar Assamese/Bangladeshi te hnen ah License pek a la ni lo niin a sawi.

Mayor chuan sumdawng pawl thenkhatte ngaihdan angin Shop License Regulations chu sumdawnna kawng a inchimralna thlen thei a ni lo tih sawi bawkin, "Mizo, ram leilung fa ngei, mahni hming hnamdang hawhtir a, sumdawnna atana hmantir tute chu sumdawnna kawnga inchimralna thlentu an ni zawk," a ti bawk.

Mayor in a tarlan tlangpuite:

Lei laih khuahkhirhna dan October ni 29, 2021 atangin hman a ni a, vawiin thlengin lei laih dilna 1,718 dawn a ni tawh a, mi 1,569 hnenah phalna pekchhuah a ni tawh a, dilna hnawl 47 awmin, dan bawhchhia mi 9 hrem an ni a, Rs. 5,000 chawitir an ni.

AMC Building Regulations kenkawhna ah kum 1 chhungin insak phalna 2000-3000 vel pekchhuah thin a ni.

Tun hnai ah dan zawm loa insa, Chanmari a Pi Dinari T. Azyu insak chu kalhsak a ni.

Property tax atanga chhiah tlingkhawm chu khawtlang tan tangkai taka hman turin Councillor ten 80% an semchhuak leh thin a, a dang 5% chu Local Council te hnenah pek ni bawkin, kum kalta khan property tax Rs. vbc. 3.2 khawn chhuah a ni a. Kumin 2022-23 ah khawn zawh a la ni lo a, tun thlengin Rs. vbc. 5 chuang khawn chhuah tawh a ni.

Aizawl ah In ding lai 45,364 a awm.