Aizawl: Mizoram sawrkar chuan buhfai a sawrkar sum hloh nasa lutuk tihzia awmna turin Non-NFSA (National Food Security Act) hnuaia ration card (card var) hmangtu ten buhfai an khulna man chu tihsan tumin ruahmanna a nei mek a, tihsanna tur zat erawh bithliah fel a la ni rih lo.

ZALEN thudawn danin, Food Civil Supply & Consumer Affairs (FCS&CA) department chuan tun dinhmun a card var/Above poverty line (APL) hmangte hnen a buhfai hralhna kg. ah Rs. 15 chu tihsan tumin rawtna a nei a, card var hmangte khul tur buhfai department in state pawn atanga leina chu kg ah Rs. 27.50 a nih laiin, retailer atanga an khulna erawh kg. ah Rs. 15 a ni.

APL ni lo, scheme dang AAY (card eng), PHH (card hring/pawl) hmanga retailer atanga buhfai khulte chu central sawrkar in man tlawm a buhfai an khulna tur (subsidy rate) ruahmanna a siam fel sa vek a, hetihlai hian card var hmangte buhfai khultirna man tihsan a nih chuan buhfai leina a sawrkar sum hlohna tam tak a phuhruk theih beisei a ni.

Hemi chungchang hi Assembly budget session neih zawh takah khan supply minister K. Lalrinliana pawhin lo sawi tawhin, a rate bithliah kawngah rawtna nei turin member te a lo sawm tawh bawk.

Thudawn danin, card var/APL scheme bik hnuaia ration card hmangtute chungchang chu state sawrkarin mipuite dinhmun thlira a kalpui niin, card var hmangtute buhfai khulna tur rate pawh state sawrkar in ruahmanna a siam tur a ni.

FCS&CA chhinchhiah danin, Mizoram a ration card awm mek 2,79,531 zingah National Food Security Act (NFSA) hnuai a AAY (card eng) ah card 25,751 awmin, chung card a hming chuang zat chu 64,956 an tling. PHH (card hring/pawl) a card 1,39,832 ah hming 6,01,092 chuangin, Non-NFSA (card var) a ration card 1,13,948 a hming chuang zat chu 4,94,778 an tling.