Kumin August thla khan a boral a, chumi hnuah a pualin concert buatsaih tura ruahmanna siam a ni a. PROJECT MENGMAWII leh PROJECT LUNGDUMTU avangin zo rimawi khawvel chuan hma a sawn tih loh rual a ni lo a, he album pahnihte hi tun thlenga hriat hlawh an la ni. Album-a hla te phei chu tunlai zaithiamte zingah pawh rawn thar thawh leh tu an awm nual mai. He album pahniha hla te hmangin NONOA — THE TRIBUTE CONCERT tih chu December ni 13, 2014 zanah Vana pa Hall-ah neih tur a ni. Airtel leh DALMIA CEMENT & HDFC BANK LTD. te’n an sponsor ang. Zo rimawi khawvel hmasawn tir tuma mahni insen pawh huam a, music lama tui thalai te kawng khat tala hma an sawn beisei avanga ram pawn thleng musician tha tha chah luh sak thintu — Nonoa tia kan hriat lar, Benjamin Lalrinawma pualin Tribute Concert neih a ni dawn a. Remmuana chuan tunlai zaithiamte;n an style theuh ang paw'n an hla phuah sa se pawi a tih loh thu a sawi. Lalremmuana nena an project avanga Mizo rimawi khawvel pen khata hmasawn tir a, Zo rimawi khawvel sawih danglamtu ti hiala chhal ngam puala hun hman turah hian, tunlai zaithiamte leh album pahniha lo zai tawhte chuan Project Mengmawii leh Project Lungdumtu album-a hla te chu an sa dawn a ni. Kum 1996-a album tihchhuah Project Mengmawi kha kan la hre reng awm e. He album-a hla he'ng — Herchhuak Ve Se (Zochhum), Khawnge I Awm, Mengmawi tihte chu Nonoa — The Tribute Concert ah hian sak a ni dawn a. Project Lungdumtu album-a hla Rem Ve Si Lo tih te leh Tidamtu tih hla te pawh Nono-a puala hun hnuhnung hman turah an rawn chhawp chhuah a ni leh ang. Nonoa — The Tribute Concert ah hian Project Mengmawii leh project Lungdumtu album-a lo zai tawh te zinga thenkhat — Tribal Power OPa, Dreamhunter vocalist Muanpuia tih te, Peter C. Lalrinmawia te pawh an thianpa hun hnuhnungah hian zai tur liau liauin rawn intuaithar leh an tum a. Anni bakah hian Bad Combination band ami OPa, Forever Young tihte bakah tunlai zaithiam hriat lar DJ Lalvenhimi leh Sangtei Khuptong te pawh an inlan bawk ang. Remmuana chuan, "A tribute concert han siamte chu a phu a, rimawi hmasawnna atana a hnathawh hi a phu a. Mi hian hrechiang ngat phei se chuan a phu zia an hre leh zual ang," tiin tribute concert neih a phu zia a sawi. Remmuana hi Nonoa nena Project Mengmawii leh Project Lungdumtu album buaipuia, hla te hi an phuah dun a ni. Album pahnih chungchang sawiin, "Khatih hun laia kan Mizo music chu leikapui style ngawr ngawr hi a ni deuh ber mai a. Leikapui ngawr ngawr hi a tha lo e tihna ni loin, kan Mizo music hian pen khat tala hma a sawn zawk kan beisei avanga buaipui kan ni a. Chutah lah, cheng khat mah phut loin zaithiam te'n min zai sak a," tia sawiin, an zai takah chuan tlem azawng den den, a hming mai mai taka lawmman an pek thu a sawi lang bawk. An hla phuah sak danah thenkhat chu an inla 'strict' viau laiin, Remmuana erawh chuan harsatna a siam loh tur thu a sawi leh a, "A tha thei ang berin sa se ka duh a, tunlai zaithiamte hi an thiam em em a; mahni style theuh nei an ni a. Kei chu ka strict vak lo. An aw mil tur leh an duhdan taka an ti kawi kual vel a nih pawhin ka rilruah harsatna ka siam lo," a ti a ni. Remmuana chuan Nonoa nena an hla, tun thlenga a tira an ziahna hmasa ber te pawh a la kawl that thu a sawi bakah, zaithiam hrang hrang zai tura an sawmna lehkha thawn pawh, an office copy te a la kawl that vek thu sawiin, "Tribute concert-naah chuan rawn khai lan te ka chak asin," tiin a sawi hial. December ni 13, 2014 zanah Vana Pa Hall-ah Nonoa — The Tribute Concert hi buatsaih a ni dawn a, mi nawlpui tan entry free a ni dawn a. Mahse, hall chhungah pawisa thlakna tur bawm erawh hun a ni thung ang. Nonoa hi kumin August ni 23 khan kum 46 mi niin he khawvel a chhuahsan a ni.