THE BREEZE chuan an single hmasa ber — Not Alone — chu an tichhuak ve ta a. Nizan atang khan YouTube lamah an dah chhuak tawh e. Kumin tir atang chauha indin he Mizo Jazz Blues band hian Zo rimawi khawvelah contemporary Jazz music hmangin debut an rawn nei ve ta a. NOT ALONE bakah hian hla dang pawh rawn neih chhoh zel an tum a, sap hla ringawt lo deuh, Mizo hla lam pawh an hrut tel vek an tum a ni... LIVE band tam tak kan nei tawh thin a, kan nei mek bawk. He'ng band hrang hrangte zingah chuan an indinna a la rei loh ang huin a thleng sang pawl chu an ni hrim hrim. Mizoram chhung chu sawi loh, state pawn thlengin The Breeze hian zai tura sawmna dawngin an lo feh chhuak ve nual ta a. Mahse, mi hriat an hlawh hnuah pawh 'single' ti chhuak lawk loa an awm hnuah — Not Alone hmangin rimawi khawvelah 'debut' an rawn nei ta a ni. Mihring kan ni a, famkim lohna khawvelah kan cheng a, harsatna leh lungngaina te hi hringnunin a ken tel ve reng a ni tih chu The Breeze chuan an single hmasa berah chuan an rawn phawrh chhuak a. Chu'ng harsatna leh lungngaihna, manganna chuan min chenchilh lai pawha, chhel taka awm a, lungngaia indawm kun mai lovin, 'Engkim a tha leh vek dawn e' tia ruahsur hnua ni eng mawi tak lo chhuak leh tur thlir tura fuihna hla a ni a. Eng ang harsatna pawh lo tawk ila, tu emaw (Pathian/thian/chhungte?) kan kiangah a awm reng a, malin kan awm ngai lovang tih lam a kawk ber. He hla hi an bassist Bruce Pachuau phuah a ni nghe nghe. Not Alone hla hi Contemporary Jazz huang chhunga khung chi a ni. Music hi guitarist Ephraim-a te Ina record a ni a, drums leh vocal erawh Toya (Kings and Prophets) a record niin, a video hi SVP kutchhuak niin, The Breeze manager Joe Ralte chuan a produce nghal bawk. The Breeze band hi Shillong-a All India Radio buatsaiha music festival — Fete Festival-a an zai tumin All India Radio hian Radio Artist A Grade nihna an lo pe a ni. Kumin Krismas leh Kum Thar bawr velah pawh hian foreign lam atanga sawmna an dawn thu ri ret ret a awm bawk.