November 1, 2022; Land Owners' Association (Vairengte-Kawngpui Package 3-6 NG 06-306) te chuan kawngpui zauhna atana an ram lakah zangnadawmna pe thuai tura sawrkar karna atan November ni 3, 2022, zing dar 6 atangin Mizoram luhka pawimawh, Vairengte leh Aizawl inkar kawngpui dan (road block) an tum.

Land Owners' Association hruaitute hnen atanga ZALEN thudawn danin, NHIDCL lamin forest cleaerance an neih hma chuan pawisa pek chhuah an tum lo a, chumi chungchang a Mizoram sawrkar hmalakna chu ngaichang lehin, thu lawmawm an dawng lo a nih chuan November ni 3, zing dar 6 atangin kawngpui dan an tum a ni.

Land Owners' Association hruaitute chuan tuna an hmalak mekna chu kum 2 chhung an lo buaipui tawh tih sawiin, chu chu Mizoram mipuiten hriatthiam pui se an duh tih an sawi a, Mizoram sawrkarin forest clearance chungchangah technical problem a awm, chinfel kan tum, min lo nghak hram rawh u tiin sawi mai se an hriatthiam tur thu te, chutih lai chuan sawrkar hotuten sem phalna an sawi hmuh reng thu te an sawi.

October ni 25, 2022 khan sawrkar karna atan kawngpui dan an lo tum tawh a, chu chu Mizoram sawrkar aiawhte nen an inbiak hnuah an thulh a, sawrkar hmalakna October ni 31, 2022 thleng ngaihchan nise an ti a, nimin khan Kolasib DC ho a meeting an neih leh hnuah November 2 thleng sawrkar ngaihchan a, thu lawmawm an dawng lo a nih chuan November ni 3, zing dar 6 atangin kawngpui dan nise tiin thutlukna an siam a ni.

Land Owners' Association hi Ministry of Road Transport & Highways hmalaknaa NHIDCL in Vairengte - Sairang inkar kawng zauh tura ram a laksak te an ni.