ZALEN November 5, 2025 : ASEP General Headquarters, Aizawl chuan vawiin khan Durtlang North a “Wildlife Garden” chu an tlawh a, garden neitu Dr. C. Lalhmingliana chu chawimawina an hlan nghal bawk.

ASEP President K. Lalmuansanga chuan Mizorama nungcha humhalhna kawnga sulsutu leh meichher chhitu mi chhuanawm tak anih avangin chawimawina hi hlan an nih thu a sawi a. Amah Hminga chuan Mizoramah nungchate humhalh an tul em avangin Wildlife Garden chu din a nih thu a sawi a, Honorary Wildlife Warden a nihna zawn atang pawhin Zoram mipuite chu nungcha humhalhtu ni vek turin a sawm a ni.

Wildlife Garden hi an chenna hmuna awm nghal a ni a. Garden chhungah hian wildlife pond te, nungcha tenau deuhte khawsakna tur atana duan te, artificial nest box te leh nungchate tana thil tul dang dangte dah a ni a. Hminga hian uluk taka vilin, garden a awmte hi fel takin a chhinchhiah thin a ni.

He garden a nungcha awm te hi humhalh puitu ni theuh turin ASEP chuan a chhehvela cheng te a ngen a ni.