January 18, 2023; A thih hnu a a ruang nungchate ei tur a hlantu, Magistrate hriatpuina thlap a engkim buaipui fel tawh, Sihphir a khawsa mek New World Laldingliana chuan a thutlukna siam tawh ah nghet takin a la ding tih sawiin, "Nungchate hmangaih leh an pawimawhna hriat hi ram leh hnam zahawmna a ni," a ti.

ZALEN in a biakna ah kum 65 mi ni tawh New World Laldingliana chuan, kum 2005 khan 1st Class Magistrate hriatpuinain a thih hunah a taksa chu Phawngpui tlang a nungchate ei turin a hlan a, chu chu tun thleng a a dinna a la ni reng tih a sawi.

"Nungchate laka kan chetzia hian hnam angin zahawmna leh hmuhsitawmah min siam thei a, nunna hrim hrim hi a zahawm em em a, tihnat leh tihchhiat hi bible ka chhiar atanga ka hmuhchhuah ah thiang lo niin ka hria," a ti.

New World Laldingliana hi nungcha humhalh leh lainatna kawng a hmala nasa tak niin, an laka lainatna leh hmangaihna lantir nan Sa lam chi atanga siam a ei/in ngai lo a, thawmhnaw lamah pawh Sa lam kaihhnawih telhna a inbel ngai lo a, pheikhawk-ah pawh Savun atanga siam a bun ngai lo bawk.