Aizawl July 6, 2022 : I&PR Minister Lalruatkima chuan nimina MHIP Day a hmanpui naah nu ho fuihin, "Nupui pasal tlak, mawhphurhna la tlak, hnam dang te el ngam turin kan fa te i chher hriam ang u," a ti.

MHIP Tuikual North Branch MHIP Day a hmanpui naah Lalruatkima chuan,
"Foreign-a hnathawk tam zawk hi hmeichhia an ni a, passport buaipui tam zawk daih hmeichhia an ni. Dawrah kal ila, bazarah kal ila, sa sat chenin hmeichhia an tam zawk vek a ni. Khawnge mipate kan awm? Nute hian kan fa mipa te hi kan enkawl hriam tawk lo em ni aw, tiin ka ngaihtuah fo ṭhin. Kan fate hriam lehzuala enkawl tur te, aia upa zahna leh Zonunmawi tlawmngaihna chhawm nung tura enkawlna tha zawk pe turin vawiina lokal khawmte hi ka chah duh che u a ni," a ti bawk.  

Ruatkima chuan, "Kan Zoramah aia upa zahna a tlahniam ta mek niin a lang a. Thalai tam zawk mut hunah an meng a, thawh hunah an mu ta si a. Aia upa zahna te, Zonunmawi tlawmngaihna kan chawm nun thinte kha a par vul leh theih nan nu te hian theih tawp chhuah thar leh ang u. Chu chuan kan tualzawl nun hi a ti nuam leh ang," a ti a. "Kan fate an talent leh a tuina zawng tak tuipuiin haichhuahpui ila, chu chuan nun kawng dikah a hruai ang tih ka ring a ni," a ti.

Aizawl West II bialtu MLA chuan, "Aia upa zahnate hi kan tun din leh a ngai hle. Zonunmawi tlawmngaihna a bo chuan MHIP, YMA, MUP nih a nuam lo ang a, Mizo nih a nuam lovang. Hawh u nute hian bul i ṭan ang u. Fa nei tam turin kan fate fuih ila, fa kan neih tlem hian kan hnam kal zel turah harsatna min thlen dawn a. Kan death rate leh kan birth rate en hian kan hnam kal zel dan tur hi ngaihtuah tham tak a tling a ni," a ti.