Aizawl: Nimin khan India ram hmun dang te rualin Raktdaan Amrit Mahotsav - a thlawna thisen pek beihpui chu Mizoramah neih a ni a. October ni 1 thleng awh tur Nationwide Voluntary Blood Donation Drive hawnna programme Aizawl Civil Hospital Blood Bank a neihah Health Minister Dr R.Lalthangliana chu khuallian a ni.

Dr R.Lalthangliana chuan a thlawna thisen pek runpui atana sawrkar laipuiin hun bik a buatsaihah Mizoram pawhin theihtawp a chhuah a, mipuiten a thlawna thisen pek pawimawhzia leh hlutzia hriaa uar leh zuala thisen pek kawnga ke an pen thar lehna ni thei se a duh tih a sawi a. Health Minister chuan, "Mizoramin vanneihna nasa tak a neih chu khawtlang, kohhran leh mipui mimir tanrualna tha hi a ni a, COVID hripui leng do let chungchangah pawh mipui tanrualna pawimawhzia a lang a ni," a ti a. Mihring nunna chhan nana thil pawimawh tawpkhawk, Kristian kan nih ang pawha rawngbawlna pawimawh, a mamawhtute tana a thlawna thisen pek hi uar leh zual tur leh Mizoram chu India ram puma titha ber kan nih theihna tura tan la turin Health Minister chuan mipuite a chah a ni. 

Voluntary Blood Donation Drive ah hian thisen pek lam inzirtirnate neih a, ram mipuite thisen pek a tulzia in hrilh hriat a, poster te, banner te tar a hun hman tur a ni a. Nimin a hawnna programme pual hian Mizorama blood bank awm zawng zawngin blood donation camp an huaihawt vek a, Aizawl Civil Hospital Blood bank chuan hmun thumah blood donation camp a huaihawt a ni. India ram pum huapin he beihpuithlak hun chung hian thisen unit 1.5lakhs lakkhawm tum a ni a. Ram puma blood bank awm zat hi 2443 niin an zinga 1541 hi private ta a ni. Kumin hian Arogya Setu App emaw www.eraktkosh.in hmangin Blood Donation Camp neih te chhinchhiah vek a ni a, thisen petute pawhin he App hmang hian Blood Donation Certificate an dawng zel thei dawn a ni.

Kum 2021-2022 chhung khan Mizoram pumah thisen unit 28191 lakkhawm a ni a. Chung zinga 25396 (90.08%) a thlawn (voluntary)-a dawn a ni. Kumin April atanga June thla thleng khan thisen unit 8842 lakkhawm tawh niin chung zinga 8203 (92%) chu mi tlawmngai a thlawna thisen petute pek a ni.