Aizawl: Kum 2022 Synod-in a rel angin Pathianni zan inkhawmah hian Mizoram Presbyterian Kohhran hnuaia kohhran zawng zawngin MLA Inthlanpui lo awm tur pualin an  tawngtai dawn. 

Tawngtai thupui atan MLA inthlanpuiah hian muanawm leh thianghlim taka inthlan ngei nan te; inthlanna fel leh thianghlim a awm theih nana duty zawng zawngte tan te; vote zawn nana pawisa leh therhlo inpek, bank account-a pawisa indahsak hmanga pawisa inpek leh a man phu tawk ni lova thil hralh a awm loh nan, campaigner-ten rilru thianghlim taka an campaign ngei theih nan te; vote hralha ngaih theih - kut tling lova pawisa leh therhlo dawn a awm loh nan vote nei zawng zawngten thil thianghlim lo an hnawl ngam nan te; kohhran, khawtlang leh ram inpumkhatna tichhe thei zawnga campaign a awm loh nan te; mi dik, Pathian tih mi, kohhran bel tlat mi, ram leh hnam hmangaihtute ngei thlan chhuah theih nan te; MLA candidate zawng zawngte tan leh thlan chhuahten sorkar tha an siam ngei theih nan te tih duan sa a ni.