Aizawl May 2, 2023 : Vawiin khan Mizoram a COVID-19 hripui dinhmun thlirho a ni a. Health & Family Welfare Minister Dr R. Lalthangliana chuan tun dinhmunah Mizoram chu hmarchhar state zinga Covid positive case nei tam ber a nih thu a sawi a, chutihrualin chi-ai-na tur a awm lo a ti. He thutkhawmah hian October 29, 2022 hnua a vawikhat nan Covid vei pakhatin nunna a chan tih tarlan a ni.

Thutkhawm kaihruaitu Health Minister Dr R. Lalthangliana chuan, "Hun engemaw chen COVID-19 hri kai thar kan neih tawh loh hnuah April thla atang khan an awm thar leh a, tun dinhmunah phei chuan hmarchhak state 8 zinga positive case nei tam ber kan ni a, hengte hi awareness kan neih that zara kan in test that vang te pawh niin a hriat a, mipuite leh official-te tan pawh chi-aina tur thil a la awm rih lo. Hetih rual hian kan hun tawng tawhte atangin kan fimkhur chuan kan inveng thei tih a hriat a, hripui laka invenna kan hriat tawhsa te, a bik takin hmai tuamna (mask) vuah uluk kha kan ngaih pawimawh thar leh a pawimawh dawn a ni. Engemaw lo thleng thut thei thilah kan talbuai loh nan phili si lova kan lo inruahman lawk erawh a tul a ni," a ti.

October ni 29, 2022 hnuah nimin khan COVID-19 hri kai mi pakhatin nunna a chan tih meetingah hian tarlan a ni a, nunna chan ta hi damlo natna khirh tak tuar sa a ni tih tarlan a ni bawk.

Thutkhawma an sawiho naah hian tunhnaia Mizorama COVID-19 positive hmuhchhuah tharte hi symptom nei deuh vek an ni a, travel history nei awm lovin, tualchhunga hri kai nia hriat vek an ni. Hri kai hmuhchhuah thar zingah naupang kum 15 hnuai lam leh kum upa lam an tam niin sawi a ni bawk a ni.

Meeting-ah hian COVID-19 vaccine hi sawrkar laipuiin a thlawnin a pe tawh dawn lo tih tarlan a ni a, Mizoram sawrkarin a mamawh angte a lei ve zel a ngai tawh dawn a, COVISHIELD chu siam chhuah a ni tawh lova, COVAXIN leh COVOVAX vaccine hman a ni tawh dawn a, RT-PCR test kit leh Covid-19 hri kai serious te enkawlna tur damdawi man to chite a tul anga lei turin NHM in ruahmanna an siam fel tih tarlan a ni bawk.

IDSP, H&FW report danin kumin April thla khan COVID-19 positive 82 (Aizawl-75, Kolasib-3, Serchhip-2, Khawzawl-2) hmuhchhuah an ni a, nimin May ni 1 khan COVID-19 positive 34 (Aizawl-18, Kolasib-9, Serchhip-7) hmuhchhuah an ni.

Meeting hi Health & Family Welfare Minister Dr R. Lalthangliana'n a kaihruai a, Health & Family Welfare Board Vice-Chairman Dr ZR Thiamsanga, MLA, H&FW Principal Secretary Esther Lalruatkimi bakah Health & Family Welfare Department official pawimawh dangte leh ZMC hotute an tel a ni.