Aizawl: Mizorama thlawhna tumhmun awmchhun Lengpui airport ah October, 2019 atangin tuna service mek Air India bakah airline dang pathum Go Air, Indigo leh Alliance Air ten ten service belh an tum.

Zalen palai in Principal Consultant, Aviation Department Wg.Cdr. J.Lalhmingliana hnen atanga thu a dawn danin a chunga tarlan airline pathum te hian DGCA atangin phalna pawh an hmu tawh tih a sawi a. J.Lalhmingliana chuan, "October atangin service tan tum mahse a hun leh ni tak chu tihchian a ni lo a, Go Air leh Indigo te hian Airbus 320 service tir an tum a, Alliance Air erawh chuan passenger 74 phur thei ATR service an tum a ni," a ti.

Thlawhna kalkawng (route) chungchangah chuan Go Air chuan Kolkata ah hmunpui neiin Kolkata-Guwahati-Aizawl-Guwahati-Kolkata ah an service dawn tih sawiin Alliance Air hian Kolkata-Aizawl an service dawn a, Indigo erawh chuan an sector tur an la sawichiang lo niin a sawi bawk.

Principal Consultant, Wg.Cdr. J.Lalhmingliana chuan Lengpui airport chu thlawhna tum nan a tha tawk tih sawiin, "Tunhnaia Airport Authority of India (AAI) in an tehna ah Lengpui airport tumhmun khauh zawng ‘pavement classification number (PCN)’ an tehna ah 36 a ni a, hei hi thlawhna lian tan pawh a hlauhawm loh a. India ram airport tha 100 zingah pawh a tel a ni," a ti.

Lengpui tum-hmun a that tawkloh chhuanlama airline te an tum/service duh lo nia sawi chungchang chu sawifiahin J.Lalhmingliana chuan, "Lengpui ah hian air bus 320 hi a rih dan ber (maximum load) ang chuan a tum thei lo ngei mai a. Mahse maximum permissible landing weight ang chuan tum a ngai lo a. Thlawhna ti rit tu a fuel hi Lengpui ah a thun theih a, chuvangin a khata an thun loh avangin an tan tum a hlauhawm loh a. Lengpui a kal an hreh avangin chhuanlam an siam mai mai thin a ni," a ti bawk.
Dahbelh dawn

Zalen palai in airlines dang 3 service belh tir an nih chuan terminal building in a zo dawn em ni tia a zawhna chhangin Principal Consultant chuan terminal building chu chei danglam an tum thu sawiin, "Tuna khualzin lo chhuahna bulah hian zin turte luhna siamin a sirah bungraw endikna (X-ray) kan dah ang a, thutna pawh dahbelh kan tum bawk a. October thla hma chuan air condition dah belh tur nen hna hi zawh hman kan beisei a ni," a ti bawk.

February ni 10,2019 a Jet Airways in an service an tihtawp hnuah Lengpui airport ah hian Air India chiah a service a, Kolkata atanga lo chhuakin Imphal a tlawh nen kar khatah flight 10 a awm a ni. Hetih lai hian Mizoram state thenawm khawpui Imphal leh Agartala ah chuan nitin flight 14 a awm thung.