Aizawl; Food, Civil Supply & Consumer Affairs (FCS&CA) Minister K. Lalrinliana’n tuialhthei dahkhawlna, oil depot lian nei ngei turin sawrkarin hmalakna a kalpui tih sawiin, a hmun tur Bairabi-ah en fel a nih tawh thu leh Sihhmui (Sairang)-ah en leh mek a nih thu a sawi a. “Tun a kan harsatna ber chu a ram chungchangah a ni,” a ti.

ZALEN zawhna chhanga he thu hi sawiin supply minister chuan Mizoramin oil depot lian a neih theihna turin October, 2019 atang khan hma an lak thu a sawi a, Indian Oil Corporation (IOC) lamin a hmun a tan Sihhmui an duh thu te; mahse, ram lei turah rem lohna a awm thu te a sawi. A ram sei zawng km 1 (metre 1,000), a theih loh pawhin metre 800-a sei, metre 60-a zau chu IOC duh dan a nih thu a sawi bawk.

Supply minister sawi danin Sihhmui lamah a rem loh hnuin, Bairabi-ah IOC duh dan chiah chiah lo deuh ram hmuh a ni a, ram neitu mi 28 an awm a, direct purchased board tihfel turin an ti a, Kolasib DC hovin a rate an tifel a, revenue department lamah tunah hian a awm mek tih a sawi.

Hemi hnu kumin January thla khan IOC lam chuan an hnen a Sihhmuiah ram zawrh an awm thu Mizoram sawrkarah an thlen leh a, chumi hmun chu tun thlengin vawi nga an en tawh a, oil company-te nen pawh vawi hnih enho a ni tawh. Chulai ram an en chu railway hnenah rel kawng kal turin a tihbuai leh tihbuai loh tur an endik tir a, railway lamin an endik zo tawh a, report erawh an la rawn pe lo. IOC lam chuan oil depot siam nan Sihhmui an duh ber.

Supply minister chuan oil depot siam tur chungchangah June thla bul lam hian IOCL, Railway leh a kaihhnawih dang official-te nen Aizawlah meeting neih a ni dawn tih a sawi.

Supply minister sawi danin Food Corporation of India (FCI) ruahmanna angin, rel kawng chhiat chhunga Mizoram mamawh buhfai phurhna tur, ‘Dimapur - Mizoram’ leh ‘Gawuhati - Mizoram’ ruahman a ni a, chumi tur atana FCI-in tender an chhuah pawh May 26, 2022 khan hawn tawh a ni.