AMPEDA-in allowance phuahchawp an ti, tihhlawhtlin tum lo

Aizawl: Mizoram Oil Tanker Driver Association ten oil unload apianga pawisa hran pek (pump allowance) an phut pek an nih loh avangin Zirtawpni atang khan load an la duh lo a, he chanchin buatsaih lai thleng hian Vairengte Oil Depot atangin Oil phurh tur challan pakhat mah pek chhuah a ni lo. Thudawn danin oil tanker driver pawl te Mizorama oil dah tur hi an phur duh lo a, mahse pump hrang hrangah oil chhekkhawl a tam avangin nimin thleng kha chuan harsatna lian thleng a la awm lo a. Tanker neitu lam chuan an thil phut chu uchuak an ti ve bawk.

All Mizoram Petroleum Dealers Association (AMPEDA) chuan thuchhuah siamin Mizorama oil phur luttu, Mizoram Oil Tanker Driver Association (MOTDA)-te thilphut an hlawh (salary) leh road ration te kan tih hlawh tlin sak hnu pawha Allowance phuahchhawp tam tham tak an phut leh zel hi tih hlawh tlin theih ah kan ngai lo a, an thil phut ber kan tih hlawhtlin tawh hnu pawha Zoram mipuite tana harsatna thlen thei zawnga Driver Association hminga mi tlemte hmalaknaa harsatna awm hi AMPEDA chuan a dem tak zet a. Mizoram chhunga oil hnianghnar taka kan neih zel theih nan AMPEDA chuan theihtawp a chhuah zel dawn a, mipuite thlamuang tak a awm tur leh chi-ai lo turin kan ngen a ni, an ti.

MIZOFED Chairman K.Laldawngliana chuan an hnuaia thawk te chu a pek theih ang ang an pe tih Zalen hrilhin an hnuaia oil phur te chu naktuk Thawhtanni thlenga an tlan lo anih chuan an permit cancell an tum niin a sawi. MIZOFED pump-ah te oil control a ni tih sawi bawk.