May 24, 2023; Internet khawvela bum tur zawng ho hian rinhlelh nachang hre lo leh bum awlsam tur zawngin, inbum dan thar an hmu chhuak reng a. Tunah hian Mizorama Cyber Crime case ziah luh zinga 75% aia tam hi ‘online financial fraud’ kaihhnawih a ni.  

Police thuchhuah tarlan danin, Digital Payment Systems hman kan uar chhoh viau laiin hemi kaihhnawiha inbumna pawh nasa takin Mizoramah ngei pawh a sang chho chak hle a. Online a sum chet velna tur thil khawih reng rengin theihtawpa fimkhur turin mipuite kan chah nawn leh a, hetianga bumna tuartu i nih chuan Cyber Helpline 1930-ah emaw, www.cybercrime.gov.in ah emaw complaint thehluh theih a ni.

Inbumna laka kan himna atan Mizoram Poice chuan a hnuaia tarlan ang hian mipuite a ngen a ni:

1. I banking password, OTP, Debit Card/Credit Card details te tumah hrilh suh.

2. Pawisa dawngtu tur i nihin eng QR Code mah scan suh. Pawisa thawn chhuaktu tur tan lo chuan engmah scan a ngai lo.

3. Phishing scammer te hian i Bank leh UPI information pawimawh ruksak che an tum reng tih hria la, email leh website lemah te, link hriat chian lohah te lut mai mai suh ang che.

4. Online-a thil i lei dawnin Search Engine atanga product zawn hi a him tawk lo thin a, chuvangin online shopping website hriat chian saah ngei thil enin lei thin ang che.

5. Engmah thawk mang lova pawisa hlawh theihna te, pawisa dah punna hlawk lutuk leh him si tih ang chi, thil tha uchuak lutuk ang hi inbumna a ni tlangpui tih hria ang che.

6. Awlsam leh rang taka Loan pe chhuak thei anga insawi application leh website lakah fimkhur ang che. Loan pe turin mimal thil pawimawh tinreng an dil a, heng te hi a hnua blackmail lehna atan te an hmang thin a ni. Loan App i hmang a nih pawhin RBI phalna nei an ni ngei em tih chian ang che.

7. Police/Army anga insawi a, thil tlawm tak taka tiral duh anga online-a inzuar thinte hi misual an ni tlangpui tih hre bawk ang che.