Tasman App Inbuma

Rs. 3,000 atanga Rs. 6,00,000 thlenga inziahluh (invest) dan a awm.

Downline neiin an kal a, sum an invest/ recharge tam dan a zirin thla tin hlawh an nei.

An recharge na chu kum 1 chhung a nung.

Sum invest tute chu Tasman atangin youtube video like leh subscribe tur an pe a, screenshot chu Tasman app ah thawnin, hlawh an pe thawn thin.

Aizawl; Mizoram atanga ‘Tasman app’ a sum invest (sum peipun tuma dah kham) tu mi thahnemtakte chuan harsatna an tawk mek a, CID Crime ah FIR thehluh ni tawhin, chiang taka hriat theih la ni lo mah se cheng Vbc. 1 chuang hloh thei dinhmunah an ding mek nia thudawn a ni.

ZALEN thudawnnain a sawi danin, Mumbai lama hmunpui nei nia hriat, Tasman app hi Mizoramah chuan mi nawlpuiin an hriat tan leh downline an neih tan chu kumin August thla kha a ni a, hetihlai hian Mizoram a bultantute erawh chuan kumin April thla vel khan hma an la tan ni a hriat a ni.

Sum invest-tute hian October 15 atang khan harsatna an tawk tan a, Tasman app lamah sum dawng angin lang mahse an account a thleng lo. Hemi vang hian ‘Tasman Mizo Headquarters’ tih hming inphuah lailawkin, hma an la nghal a, October 20 khan CID Crime-ah FIR thehlut nghalin, tunah hian Mizoram hmun hrang hranga sum invest-te data lakkhawm mek a ni.

 Tasman Mizo headquarters-a an hruaituten ZALEN an hrilh danin, tuna data an lakkhawm mekah Tasman app-a sum invest mi 400 hriatchian an awm tawh a, lain report lote nen mi 1,000 bawr vel tlin an inring.     He app a pawisa tang zat pawh felfai taka chhut fel hleih theih a la ni lo a, rin danah chuan cheng Vbc. 1 bawr vel tling tur a ngaih a ni.    

Mizoram police-te lakah an beiseina zawng zawng an nghat tih Tasman Mizo Headquarters hruaitute chuan sawiin, an hmalakna an rintawk thu an sawi a, a tul a nih phawt chuan anmahni lam pawh Tasman app headquarters awmna hmun nia hriat, Mumbai Crime branch lam thleng pawh a kal an inhuam thu an sawi.

Tasman apps-ah hian sum invest/ recharge dan hrang hrang a awm a, chungte chu CMO - 6 lakh, CEO - 2.7 lakh, Boss - Rs. 90,000, Director - Rs. 45,000, Manager - Rs 15,000, Asst. Manager - Rs. 6,000, Full employee- Rs. 3,000 te an ni.