Aizawl: Agriculture Minister C.Lalrinsanga chuan, ‘Organic Food India Conclave 2019’ a hmanpuinaah, “Northeast India hi organic agriculture beihpui thlaknaa tana hmun duhawm ber a ni,” a ti.

Nimin khan Agriculture Minister C. Lalrinsanga hian ‘Organic Food India Conclave - 2019’ chu khuallian niin Novotel, Juhu, Mumbai-ah a hmanpui a, kum 2020-ah Organic agriculture market hlutna hian US Dollar maktaduai 200-a khum tawh tura ngaih a nih thu a sawi a. Prime Minister Narendra Modi-a’n ‘North East India hi organic movement kalpui nan a tha’ tia a lo sawi thin chu sawi chhawngin, “Sawrkar laipui ruahmanna hnuaiah Mission Organic Value Chain Development in North Eastern Region (MOVCD) chu kalpui mek a ni,” a ti a. “Mizoramah pawh MOVCD hnuaiah hian Thingpui, Mizo Hmarcha, Aieng lehSawhthingah te beihpui thlak mek a ni a. A hlawhtlinna pawh kan tel chho zel. Mizo Hmarcha phei chu tunah hian Geographical Indication tih fel tawh a ni tawh a, market ah pawh a hlutna a sang tawh hle a ni,” a ti bawk.

Minister C.Lalrinsanga chuan Mizoram chuan organic technology-ah te, value chain marketing leh market linkage-ah te hma lakna a a neih tul tih sawiin heng kawngah te hian Organic movement-a khawvel hmun hrang hranga enterpreneur-te chu Mizoram sawrkar chuan thawhpui a châk thu leh hmalakpui tura a inhuam thu a sawi sawi bawk

Organic Food India Conclave 2019-ah hian national leh international level-a service provider te, buyer leh exporter leh mi thiam rualten organic chungchanga thiamna sang zawk inhlanchhawnna chungchang leh organic market lama insumdawn tawnna leh a kaihhnawih thil hrang hrang sawi hoin an inhmukhawm a ni.