Aizawl; Officer on Special Duty (OSD) to Chief Minister, Rosangzuala’n October 2021 - August 2022 chhunga hamthatna hrang hrang a neih/hmuha sawrkar sum hman tawh zat chu Rs. 9,08,747 a tling a, thla khata Re. 1 hlawh ni mah se, a takin hlawh pek a ni ngai lo.

ZALEN-in RTI hmang a a zawh, chief minister office-a State Public Information Officer (SPIO)-in a chhan danin, OSD to Chief Minister turin September 14, 2021-ah ruat a ni a, Mizoram sawrkar hnuaiah secretary rank pek niin, chief minister officer-ah a thu a. Thla khatah Rw. 1/- a hlawh a, a takin hlawh pek a ni ngai lo thung.

Mizoram sawrkar atanga hamthatna a dawn chungchang te, chumiah chuan state sawrkar sum hman/sen tawh zat chungchangah SPIO chuan OSD to CM Rosangzuala chu secretary rank pek a nih angin secretary-te hamthatna dawn ang a dawng a, OSD to CM atana ruat a nih atangin, TA/DA bill-ah sawrkar sum Rs. 3,79,288 hman a ni tawh a, MR bill-ah Rs. 1,44,459 leh Vehicle outsourcing bill (October, 2021 atanga August, 2022) chhungin Rs. 3,85,000, a vaiin Rs. 9,08,747 hman a ni tawh bawk.

Media hrang hranga tar lan tawh angin, Department of Personnel & Administrative Reforms (DP&AR) Secretary K. Lalthawmmawia’n September 14, 2021 a hriattirna (notification) a tihchhuaha a lan danin, OSD to CM atan Rosangzuala s/o F. Lalsanga (L), Luangmual, Aizawl ruat a ni a, a awmna hmunpui (headquarters) chu Aizawl a ni ang a, engtik hunah pawh chawlhtir (terminate) theih a ni.

Lawmman/ hlawh (honorarium) atan sawrkar atangin thla khatah Re. 1 dawng tura tih a ni a, Mizoram sawrkara secretary tlukpui (rank) a ni.