Our Daily Bread Ministries (India) hruaitute chuan Thawhlehni khan Baptist Church of Mizoram (BCM) headquarters an tlawh a, thawhho dan turte an sawiho.

ODB (India) hruaitute Director John D. Samuel leh Asst. Director Moses te niin Rev. R. Lalbiakliana, General Secretary leh Rev. Dr. R. Lalthanmawia - AGS Mission bakah Lalruatkima, Administrative Officer ten dawngsawin general secretary room-ah an inkawm.

ODB (India) hotute hian intenational level-a an hotu, USA-a mite tirha kal an nih thu sawiin BCM nena thawhho dan kawng a awm ang em tih thu an thlen.

Inkawmnaah hian general secertary chuan BCM rawngbawlna sawiin mission-a hma a lak dante a sawi fiah a. ODB hruaitute pawhin an rawngbawlna leh hma lak dan tlangpui an sawi bawk.

Thawhho dan tur kawng zawn tha an ti a. Thawhho dan turte duangin ruahmanna siam ni se, BCM Administrative Committee kaltlangin Assembly Executive Committee leh assembly-ah thlen ni se tiin thu an dah.

ODB hi khawvel puma chanchin tha puan darh kawnga hma latu niin kum 1938-ah Dr. Martin De Haan-a’n USA-ah ‘Detroit Bible Class’ tiin a din a, kum 1994-ah Radio Bible Class (RBC) tia hming thlakin, 2015 atangin ‘Our Daily Bread Ministries’ tiin a hming a pu leh ta a ni.

Ram hrang hrang leh hnam hrang hrangah Pathian thu chhiar tur leh tawngtai kaihruainate siamin tawng 58 hmangin ram 150-ah Pathian thu an thawn darh mek.

India ramah hian kum 2003 khan office building nghet neiin an indin a, India tawng lian deuh deuh - English, Hindi, Tamil, Telugu, Kannada, Marathi leh Malayalam hmanga ziak Bible zirna leh Pathian thu ziakna (Bible track)-te siamin an thehdarh mek a ni.