Aizawl: Health Minister Dr. R. Lalthangliana chuan mipui te chu oxygen-ah harsatna a thlen a rin loh thu a sawi.

Nimin Lengpui a tlawhna ah he thu hi sawiin MizoraminCovid Vaccine 299,870 an dawn tawh thu leh ni khatah mi singkhat aia tlem lo chu pek dan tlangpui a nih thu a sawi. Nimin thleng khan mi 202,975 vaccine pek tawh an ni a, first dose la tawh chu mi 162,463 an ni. India ram pumah 25% chauhin vaccine an lak laiin, Mizoramah chuan kum 45 chin chunglam pek tawh hi 41.83% a nih thu a sawi bawk. 

May ni 1 atang chuan kum 18 chin pe turin Central chuan ruahmanna  siamin a man lak thuah thuchiang nghah mek a nih thu a sawi a. 

“Oxygen chungchangah India ram hmun thenkhatah harsatna an tawk tih kan hria a, keini Mizoramah chuan tuna kan dinhmunah chuan harsatna lutuk kan nei dawn lovin ka hria. Private-a siamte an lo awm ve bawk nen Oxygen-ah Zoram mipui chi-ai lo turin ka chah a ni. Nimin khan Union Health Minister hnenah Vaccine mamawh thulhah min rawn pe zel turin ziakin ka thlen tawh," a ti bawk.