Aizawl: Goa khawpui Panaji ah kum khat plastic khapna kalpui a ni tawh a, he khapna hi mipuiin an zawmthat avangin a hlawhtling hle.

Tun hnaia Goa khawpui Panaji tlawhtu Mizoram chanchinbu mite nen an inkawmnaah Corporation of the City of Panaji Commissioner Shasank Mani Tripathi IAS chuan Panaji khawpuiah nikum 2018 atangin plastic hman khap a ni tawh tih sawiin, “Corporation of the City of Panaji-ah hian plastic micron 50 chin chu hman kan khap a, dawrkaite pawh zuar lo turin kan hriattir a. Zuar lui man an awm chuan a tum khatna atan Rs. 5,000 chawitir an ni a, man nawn leh an nih chuan an sumdawn phalna (trade license) tihtawp sak an ni,” a ti.

Commissioner chuan plastic micron 50 chung lam chu sawngbawl a awlsam avangin an khap ve lo tih a sawi bawk. A thlak nan buara bag leh tawih thei bag an hmang mek bawk. Bawlhhlawh tawih thei chu ni tin khawn a ni.

Commissioner chuan, “Bawlhhlawh bawm hi chhung tinin an nei vek a, a tawih thei leh tawih thei lo thliar hrang lote chu a paihtuten an laksak duh lo a, thupek hi mipuiten an zawm tha hle a ni,” a ti bawk.

A tawih thei hi leitha atan siamin an hralh a, tawih thei lo hi thliar hrang leh chhawngin a khat tawkin an lilam (auction) thin a, hemi atang hian kum khatah nuai 30-40 inkar an hmu let leh thin a ni. Bawlhhlawh paihna senso (garbage tax) atan hian chhungkua, hotel leh restaurant te chuan chawi an nei bawk.