Parliament thlasik thutkhawm lo awm turah Congress president hlui, Rahul Gandhi leh an party hruaitu hlun dang, Jayram Ramesh leh Digvijaya Singh te chu an tel dawn lo nia sawi a ni.

Congress hruaitute hi Gandhi-a’n ‘Bharat Jodo Yatra’ a kalpui mekah an tel dawn avangin session hi an tel ve hman dawn lo nia sawi a ni.

Party hruaitute chuan Bharat Jodo Yatra atanga rilru dang pua kalsan chu an remti chiah lo nia sawi a ni.

Parliament thlasik thutkhawm hi Nilaini atanga tan tura ruahman a ni a, Parliament building hlui zawka neih tur a ni a. Thutkhawm hun hi Gujarat assembly inthlan avangin thla khat laia sawn hlat a ni nghe nghe.

Congress party chu Inrinni tlai khan session inbuatsaih nan an thukhawm a, hetah hian Rajya Sabha-a Leader of Opposition (LOP) tur an tifel tura ngaih a ni a. Strategy Group thuthawm hi Sonia Gandhi-i’n a kaihruai.

Mallikarjun Kharge chuan thla hmasaa an party president inthlan a chuh dawn khan Rajya Sabha-a LOP a nihna a bansan a, hei hi an party-in mi pakhatin chanvo pakhat chelh an kalpui zuia a tih a ni a, party president-ah a tling zui.

Congress hruaitute hian Kharge-a bik erawh ngaihhnathiama LOP nihtir leh an tum nia sawi a awm a. Thutlukna hi Gandhi-i hova an thutkhawmah an siam ang.

P. Chidambaram leh Digvijaya Singh chu LOP ni tura rinkai an ni ve bawk.