Aizawl August ni 8, 2024 : Tukin zing khan MNF Senior Vice President, Dr. R.Lalthangliana chuan 'MNF Unit leh Congress Unit AMC Ward No 6 by-election campaign/joint meeting' chu Edenthar Local Council Chairman Jessie Malsawmkima Inah hman puiin a tlawh a. He hunah hian Congress leh MNF Unit hruaitu thenkhat telin thu tawi an sawi bawk.

Dr.R.Lalthangliana chuan Lawngtlai MDC by-election ah pawh MNF leh Congress an thawhho avangin hnehna sang tak an chang tih sawiin, tun AMC By-Election ah pawh hnehna sang tak an chan ngei a beisei thu a sawi. Party lian ngelnghet hlun tak pahnih thawhhona hi vote a pelhe loh chuan hnehna sang tak an chan ngei a rinthu a sawi. "Vanduai thlak takin John Zosangliana Ralte a boral a, he a hmun ruak luahkhat tur hian a nupui Lalrinfeli (Mafeli) hi Congress leh MNF chuan common candidate-ah kan hmang a, lo thlangtling ngei turin bial mipui ka ngen a che u," a ti.

"Tun AMC-a by-election a kan common candidate symbol hi hmeichhia leh mipa inkai lai a ni a, hei hian thui tak entir a neih ka ring. Nikum kum tawpah MLA general election-ah khan party en lovin, a mihring pawh en chuang lovin ZPM symbol ngawr ngawr kha enin mipuiin an thlang tling ta mai a ni. Eng inthlanah pawh khatiang boruak ringawt kha chu a thlen nawn ka ring tawh lo," MNF Senior Vice President chuan a ti.

Congress leh MNF common candidate chu mipui duhthusam ang diak diaka a campaign naah a lo phalo anih pawhin lusun khawhar hlimhlawl a ni tih bial miputen lo hrethiam tura a ngen thu Dr.R.Lalthangliana chuan a sawi bawk.

Tukin Congress leh MNF inkawmhonnaah hian inpawh tlang leh lungrual taka thawhhona an neih theih avang te, joint campaign committee chairman leh a thawhpuite thahnemngaihna leh lungrualna zawng zawngah MNF Senior Vice President chuan lawmthu a sawi bawk.